Москва биржатын «Финуслуги» маркетплейсатыгар Дьокуускай народнай облигацияларын символыгар анаан онлайн-куоластааһыны саҕалаата. Үс вариантан талыахха сөп — сэлии, хотугу таба уонна саха лайката.
«Сотору кэминэн Финуслугаҕа Дьокуускай народнай облигациялара кэлиэхтэрэ — биһиэхэ регион тыынын биэрэр символ наада. Бииргэ талыахпыт», — диэн маркетплейс телеграм-ханаала иһитиннэрдэ.
Бэчээттэнэр кэмҥэ ордук элбэх куолаһы сэлии иһин биэрбиттэр (50%), онтон хотугу таба (27%), салгыы саха лайката (23%) барар.
Санатан эттэххэ, Дьокуускай норуот облигациятын «Финусуслугаҕа» 2025 сыл алтынньытыгар туруорар былааннаах. Үп-харчы уулуссалары, уопсастыбаннай миэстэлэри көҕөрдүүгэ, ону тэҥэ «Старый город-2» бырайыакка ыытыллыаҕа. Туруоруу суумата 30 мөлүйүөн солкуобай буолуоҕа, эргийэр болдьоҕо — биир сыл.
«Старый город-2» бырайыак 55 уонна 55А оройуоннарын туристарга, олохтоохторго умсугутуулаах сиргэ кубулутан, Дьокуускай историческай нэһилиэстибэтин чөлүгэр түһэриигэ уонна харыстааһыҥҥа туһуламмыт. Далааһыннаах тупсарыыны, куорат табыгастаах эйгэтин тэрийиини уонна өрөспүүбүлүкэ киин куоратын историческай өттүгэр уопсастыбаннай сирдэри сайыннарыыны көрөр.
