Өлүөнэ өрүһү туоруур муус суоллар билигин да сабыылаахтар, ити эрээри сокуоннайа суох мууска тахсар суоппардар бааллар, бэйэлэрин уонна пассажирдары олохторугар кутталы үөскэтэллэр. Итинэн сибээстээн, ГИМС исписэлиистэрэ Госавтоинспекция уонна Дьокуускай административнай хамыыһыйатын үлэһиттэрин кытары профилактическай рейдэлэри ыыталлар.
«Бүгүн Дьокуускай 204-с микрооройуонугар Намыв ыстаансыйатын сиригэр-уотугар массыыналар мууска тахсалларын хонтуруоллуурга холбоһуктаах рейдэ тэрээһин ыытыллар. Бүгүҥҥү күҥҥэ Дьокуускай куорат сиригэр-уотугар муус суол барыта сабыыылааҕын санатабыт. Мууска тахсар табыллыбат», — диэн кыра суудуналарга кылаабынай судаарыстыбаннай иниспиэктэр Аурика Смирнова иһитиннэрдэ.
Саха сиригэр барыта 47 муус суола учуокка турар. Бүгүҥҥү туругунан үс эрэ официальнайдык аһылынна: Эдьигээҥҥэ, Өлөөҥҥө уонна Үөһээ Бүлүү оройуоннарыгар.
ГИМС иниспиэктэрдэрэ хамыыһыйа састаабыгар киирсэн, көҥүлэ суох тахсыылары туоратар туһугар сабыылаах муус суоллары өрүү кэтээн көрө сылдьыахтара. Кэһии иһин Саха сирин КоАПын 9.10 ыстатыйатынан административнай эппиэтинэс көрүллэр: дьоҥҥо 3 — 5 тыһыынча солкуобайга диэри; дуоһунастаах дьоҥҥо – 20 — 50 тыһыынча солкуобайга диэри; юридическай сирэйдэргэ — 100 тыһыынчаттан 1 мөлүйүөн солкуобайга диэри.
This post was published on 12.11.2025 18:11 18:11