2025 сыл саҕаланыаҕыттан Дьокуускайга Медицина киинин оҕо отделениетын амбулаторнай медицинскэй реабилитациятыгар 14 аныгы оборудование кэллэ. Кинилэр ортолоругар – физиотерапевтическай аппарааттар, ультразвуковой уонна ТЕКАР-терапияҕа, электроэмтээһиҥҥэ араас көрүҥнээх аппарааттар, УВЧ, диэн Саха сирин доруобуйа харыстабылын министиэристибэтэ иһитиннэрэр.
Итини сэргэ кырачаан ыарыһахтарга илиилэрин-атахтарын сайыннарарга пневматическай дьайар күүстээх тренажердар уонна биологическай сибээстээх тренажер киирдилэр. Өссө биир инновационнай атыылаһыы — ИМИТРОН тренажер. Кини церебральнай параличтаах оҕолорго сөптөөх хаамыы стереотибын үөскэтэр.
Отделениеҕа олус улахан суолталааҕынан реабилитологтар үлэлэрин чэпчэтэр, ыарыһах эмтэниитин ордук табыгастаах оҥорор кинезотерапия остуолун ааҕаллар.
Саҥа оборудование РФ президенэ Владимир Путин сорудаҕынан олоххо киирэр «Уһун уонна көхтөөх олох» национальнай бырайыак дьаһалларын чэрчитинэн туолла. Национальнай бырайыак биир сүрүн хайысхата — дойдуга медицинскэй реабилитацияны сайыннарыы.
«Кэлиҥҥи сылларга чөлүгэр түһэрэр медицинаҕа туттуллар саҥа технологиялар уонна оборудованиелар эмтиир процеһы хаачыстыбалаахтык уонна көдьүүстээхтик оҥорор кыахтаахтар. Бу оҕолорго ыарыыттан, эчэйииттэн түргэнник чөлүгэр түһэригэр көмөлөһүөҕэ. Кылаабынайа, дойдуга медицинскэй реабилитация сайдар, ол аата маннык медицина көмөтө ыарыһахтарга табыгастаах буолуоҕа», — диэтэ отделение сэбиэдиссэйэ Татьяна Яковлева.
Дьокуускайга Медицина киинин амбулаторнай медицинскэй реабилитацияҕа оҕо отделениета – биир саамай наадалаах. Манна неврологическай кэһиилээх, киин ньиэрбэ систиэмэтин ыарыылаахтар, эчэйии кэнниттэн, удьуордаах ыарыылардаах оҕолор эмтэнэллэр. Отделениеҕа хас биирдии оҕоҕо анаан кэлим реабилитациялыыр туспа былаан оҥоһуллар. Чөлүгэр түһэрэр эмтээһини оҕолор педиатр, невролог, логопед, психолог, эмтиир физкультураҕа инструктор, реабилитационнай медицинаҕа исписэлиистэр көмөлөрүн ылаллар.
