2022 с. аан дойду үрдүнэн «Өйдөбүнньүк саада» аан дойдутааҕы акция ыытыллыаҕа. Акция историяны кэриэстииргэ уонна сэбиэскэй норуот дьоруойдарын өйдөбүллэрин харыстыыр ураты суолталаах. Сүрүн сыала-соруга диэн, Аҕа Дойду Улуу сэриитигэр өлбүт 27 мөл. дьону кэриэстээн -27 мөл. маһы олордооһун. Акция Арассыыйа Рослесхоһун уонна айылҕа харыстабылын министиэристибэлэрин өйөбүллэринэн ыытыллар. Тэрийээччилэринэн «Кыайыы Волонтердара» Бүтүн Арассыыйатааҕы общественнай хамсааһын уонна полководецтар ааттарын үйэтитэр пуонда буолаллар, диэн СИА-ҕа Саха сирин экологиятын пресс-сулууспата иһитиннэрэр.
Акция РФ 85 субъектарыгар уонна тас дойдуларга ыытыллыаҕа. Бэлиэтээн эттэххэ, акция хайыы- үйэ кулун тутар 18 күнүттэн Арассыыйа соҕуруу өттүгэр саҕаламмыта.
Саха сиригэр «Өйдөбүнньүк саада» сааскы акциянан сибээстээн, ыам ыйын 20 күнүгэр 14 чаастан Кыайыы пааркатыгар (Октябрь 50 сыла) 1 гектар иэннээх сиргэ бэс уонна хатыҥ мастары олордор былааннаахтар. Тэрээһиҥҥэ өрөспүүбүлүкэ баһылыга Айсен Николаев, бырабыыталыстыба бастакы солбуйааччыта Дмитрий Садовников, айылҕа харыстабылын миниистрин солбуйааччы Евгений Перфильев ону тэҥэ, ойуур салаатын уонна общественнай тэрилтэлэр үлэһиттэрэ кыттыыны ылыахтара.
Акцияҕа кыттыан баҕалаахтар олорор сирдэринэн лесничество үлэһиттэриттэн олордор мастары босхо ыларга сайаапка түһэриэхтэрин наада.
