Дьокуускайга Кыайыы 80 сылыгар икки пааматынньык туруоруллуоҕа — Сэбиэскэй Союз Геройа Федор Поповка анаммыт искибиэргэ уонна аатырбыт артиллерист Гавриил Протодьяконовка Кыайыы пааркатыгар. Геройдар скульптуралара оҥоһулунна уонна сотору кэминэн куоракка кэлиэҕэ, куорат дьаһалтатыгар этилиннэ.
Кыайыы 80 сылыгар анаммыт тэрээһиннэр Дьокуускай куоракка ыам ыйын 5 — 9 күннэригэр буолуохтара. Ол кэмҥэ дылы бары бэлэмнэнии үлэтэ бүтүөхтээх. Ол иһигэр Кыайыы болуоссата, Кыайыы паарката, геройдар ааттарынан уулуссалар өрөмүөннэрэ, мураллар оҥоһуулара, аншлагтар уонна мемориальнай дуоскалар саҥардыллыылара.
Дьокуускайга ыам ыйын 5 — 9 күннэригэр Россия аахсыйалара «Окна Победы», «Стена Победы» уонна «Свеча памяти» ыытыллыахтара, «Поем двором» бэтэрээннэр олорор дьиэлэрин олбуордарыгар кэнсиэртэр уонна да атын тэрээһиннэр.
Саҥа аахсыйалартан биирдэстэрэ «Лента памяти» буолуоҕа — Ленин проспегынан 1418 миэтэрэ уһуннаах георгиевскай лиэнтэ тардыллыаҕа.
This post was published on 25.03.2025 16:55 16:55