Дьокуускайга «Кыһын Саха сириттэн саҕаланар» бэстибээл саҕаланна. Бырагыраамаҕа «Саха сирин амтана», «Саха сирин бриллианнара», «Строганина-2025» куонкурустар тэриллэллэр. ЯСИА-ҕа тэрийээччилэр иһитиннэрбиттэринэн, киин куорат ыалдьыттарын уонна олохтоохторун сүрүн тэрээһиннэрин таһынан толору бырагыраама күүтэр: быыстапкалар, кэнсиэртэр, маастар-кылаастар, спортивнай күрэхтэһиилэр уонна бары уокуруктарга, куорат таһыгар Саҥа дьыл харыйаларын сырдатыы.
«Биһиги куораппыт 14-с төгүлүн үгэс буолбут «Кыһын Саха сириттэн саҕаланар» бэстибээли көрсөр. Бу бэстибээл Дьокуускай “сирэйэ” буолла. Быйыл биһиэхэ Арассыыйа араас куораттарыттан, регионнарыттан, Кытайтан, Монголияттан уонна Перуттан ыалдьыттар кэллилэр. «Саха сирин Амтана», «Саха сирин бриллианнара» уонна «Строганина» куонкурустар эмиэ куораппыт брендтара буолбуттарыгар олус үөрэбит. Биһиги национальнай культурабытын, айылҕабытын таптыырбытын төһө кыалларынан элбэх киһи билэригэр олус интэриэстээхпит», — диэтэ Саха сирин баһылыга Евгений Григорьев.
Кыһын урут да, билигин да хоту дойду культуратын сорҕото — «биһиги генокодпут сорҕото, таптыахтаах пыт» диэн баһылык тоһоҕолоон бэлиэтээтэ.
ХИФУ социальнай-культурнай сервис уонна туризм кафедратын доцена Туйара Пономарева национальнай брендтары көҕүлээһин ыалдьыттары тардыыга, туризмы сайыннарыыга уонна культурнай нэһилиэстибэни харыстыырга көмөлөһөрүн бэлиэтээтэ.
«Манна мууһу, тымныыны, хотугу сардаҥаны уонна уһун саха кыһынын кытта сибээстээх культурабытын тиэрдэр эдэр дьон элбэҕин көрөбүт», — диэтэ.
Перуттан кэлбит ыалдьыт, «Бриллианты Якутии» муус уонна хаар скульптураларын норуоттар икки ардыларынааҕы куонкуруһун кыттыылааҕа Хосе Луис Малька Атенсио бэстибээл аан дойдуга биллэрин тоһоҕолоон бэлиэтээтэ.
«Миэхэ манна сылдьыы улахан чиэс. Тэрийээччилэргэ итинник суолталаах тэрээһиҥҥэ итиитик-истиҥник көрсөн, кыттар кыаҕы биэрбиккитигэр махтанабын. Бэстибээлгэ сөптөөх үлэни оҥорорго бары сырабын ууруом», — диэн кэпсээтэ.
Эрдэ «Кыһын Саха сириттэн саҕаланар» Бүтүн Арассыыйатааҕы бэстибээл саха норуотун үгэстэрин, искусствотын, спордун, гастрономиятын уонна регион кыһыҥҥы эйгэтин түмэр диэн иһитиннэрбиппит.
This post was published on 24.11.2025 11:09 11:09