Дьокуускай төрөөбүт күнүгэр 40-ча тэрээһин ыытыллыаҕа эрээри, бырааһынньыктааҕы салют буолбат. Бу туһунан өрөспүүбүлүкэ киин куоратын баһылыга Евгений Григорьев «Россия 24» телеханаалга «Куораты кытта быһа эфир» бырагыраамаҕа эттэ, диэн ЯСИА иһитиннэрдэ.
«Тапталлаах куораппыт төрүттэммитэ 393 сылын бэлиэтиир дьаһалы биэс сиргэ ыытыахпыт. Улуу Кыайыы 80 сылын учуоттаан, 40-тан тахса тэрээһин буолуоҕа. Быйыл бырааһынньыктааҕы салют буолбат диэн быһаарыы ылынныбыт”, — диэтэ Григорьев.
Дьокуускай баһылыга бэлиэтээбитинэн, бырааһынньык үгэс буолбут сирдэрин таһынан саҥа локациялар кыттыахтара. Холобур, Кыайыы Пааркатыгар анал байыаннай дьайыы кыттыылаахтарын уонна волонтердары чиэстээһиннэр ыытыллыаҕа.
«Тэрээһиннэр бары балаҕан ыйын 8-14 күннэригэр ыытыллыахтара. Өрөспүүбүлүкэ болуоссатыгар кэнсиэр буолуоҕа, култуура уонна сынньалаҥ паарката кыттыаҕа, Эргэ куорат сиригэр үгэс буолбут дьаарбаҥкалар барыахтара. Доҕордоһуу болуоссатыгар эмиэ дьон мустуоҕа», — диэн иһитиннэрдэ Евгений Григорьев.
This post was published on 19.08.2025 12:27 12:27