Дьокуускайга оттук саҥа сезонугар бэлэмнэнэллэр. Үлэ тэтимнээхтик барар, диэн мэр Евгений Григорьев «Куораты кытта быһа эфир» биэрии кэмигэр иһитиннэрдэ.
«Чуолаан, олорор дьиэлэр 81% — тан тахса уонна социальнай эбийиэктэр 93% — нарын ититэр ситимнэрин сууйуу түмүктэннэ. Үлэ ааспыт сылы кытта тэҥнээтэххэ, урутаан иһэр», — диэн бэлиэтээтэ Евгений Григорьев.
Мэрия иһитиннэриитинэн, Дьокуускайга сылааһы балаҕан ыйын 6 күнүгэр социальнай тэрилтэлэргэ, оттон балаҕан ыйын 15 күнүттэн олорор дьиэлэргэ киллэрэр былааннаахтар. Ол эрээри, сылааһы биэрии чопчу даталара тас салгын температуратыттан тутулуктаныаҕа.
Санатан эттэххэ, итиини үксүгэр күннээҕи орто температура биэс күн устата +8 кыраадыстан намтаатаҕына киллэрэллэр.
This post was published on 18.08.2025 16:12 16:12