Саха сирин бырабыыталыстыбатын бэрэссэдээтэлэ Кирилл Бычков өрөспүүбүлүкэ миниистирдэрин кабинетын планернай мунньаҕын ыытта. Премьер-миниистир Дьокуускайга грипп уонна ОРВИ ыарыыларыгар, гражданнар сорох категорияларын эминэн-томунан хааччыйыыга, үлэтэ суох буолуу таһымын сарбыйыыга билиҥҥи балаһыанньаҕа болҕомтотун уурда. Бу туһунан www.sakha.gov.ru саайт иһитиннэрэр.
Сүбэ мунньах кэмигэр нэһилиэнньэ ортотугар грипп уонна ОРВИ ыарыылара элбээһинэ, киин куорат уопсастыбаннай миэстэлэригэр харантыын дьаһалларын кэһии бэлиэтэннэ.
«Маассабай уопсастыбаннай тэрээһиннэр бараллар, спортивнай күрэхтэһиилэр ыытыллаллар, бары кинотеатрдарга, кафеларга, атыы-эргиэн кииннэригэр оҕолор, оскуола оҕолоро толору. Маны хонтуруоллуохха наада, вакцинациялааһыны күүһүрдүөххэ. Эмп – том атыылаһыыга бигэргэтиллибит лимит барыта 98 бырыһыана туһанылынна», — диэн Саха сирин бырабыыталыстыбатын бэрэссэдээтэлин солбуйааччы Георгий Степанов иһитиннэрдэ.
Вице-премьер этэринэн, 2025 сыл тохсунньу — балаҕан ыйдарыгар Саха сиригэр уопсай үлэтэ суох буолуу таһыма 3,1% тэҥнэстэ, үлэтэ суох дьон ахсаана 11,6 тыһыынча киһинэн кыччаата.
“Былырыын туһааннаах кэм иһигэр үлэтэ суох буолуу таһыма 5,1% этэ”, – диэн Георгий Степанов санатта.
Кирилл Бычков сүбэ мунньах түмүгүнэн, Саха сирин баһылыгын сорудахтарын кэмигэр толорууга, тутуу, энергетика уонна туризм эйгэлэригэр былааннаах көрдөрүүлэри ситиһиигэ кэккэ сорудахтары биэрдэ.
