Дьокуускайга «Модун» спорткомплекска тохсунньу 24-25 күннэригэр Дмитрий Максимов бирииһигэр уолаттар ортолоругар греко-римскай тустууга өрөспүүбүлүкэ күрэхтэһиитэ буолуоҕа. Күрэхтэһии Саха сирин үөрэнээччилэрин Спартакиадатын сочуотугар ыытыллар, диэн ЯСИА иһитиннэрэр.
Күрэхтэһии кыттыылаахтарынан 2009-2010 уонна 2011-2012 сыллардааҕы төрүөх уолаттар категорияларынан арахсан буолуохтара. Улахан уолаттарга 12 комплект наҕарааданы, онтон кыраларга 15 комплект оонньонор.
Ол түмүгүнэн өрөспүүбүлүкэҕэ күүстээх бөҕөстөр быһаарыллыахтара итиэннэ кыайыылаахтар Саха сирин үөрэнээччилэрин «Спортивные якутяне» спартакиада чэрчитинэн бэйэлэрин муниципальнай хамаандаларыгар сочуот биэриэхтэрэ. Ол иһин кыттааччы элбэх буолара күүтүллэр.
Маны таһынан, күрэхтэһии өрөспүүбүлүкэ сүүмэрдэммит хамаандатын састаабын тэрийиигэ түһүмэх буолар, ону тэҥэ бастыҥ хамаандалары быһаарыахтара.
This post was published on 14.01.2026 11:03 11:03