Дьокуускайга балаҕан ыйын 9-10 күннэригэр «Гражданскай общество: Кыайыы аатыгар түмсүү» гражданскай форум буолар. Улахан тэрээһин Аҕа Дойду Улуу сэриитигэр Кыайыы 80 сылыгар, Российскай Федерацияҕа Дойдуну көмүскээччи сылыгар уонна өрөспүүбүлүкэҕэ Дойдуну көмүскээччи сылыгар ананна. Форум девиһэ — «Биһиги күүспүт түмсүүбүтүгэр!».
Форум былаас органнарын, кэммиэрчэскэйэ суох тэрилтэлэри, уопсастыбаннай түмсүүлэри, үөрэх тэрилтэлэрин уонна көҕүлүүр гражданнар бэрэстэбиитэллэрин түмүөҕэ. Тэрээһин сүрүн сыала -патриотическай иитии, историческай өйү-санааны харыстааһын уонна социальнай көҕүлээһиннэри өйөөһүн боппуруостарыгар гражданскай уопсастыба сыратын түмүү.
Балаҕан ыйын 9 күнүгэр кэммиэрчэскэйэ суох сектор сайдыытын боппуруостарыгар болҕомто ууруллуоҕа. «Президент граннарын Фондатын куонкурустарыгар кыттар уонна кыайар кыахтара» былаһааккаҕа кыттааччылар өрөспүүбүлүкэҕэ олоххо киллэриллэр бырайыактарга грант өйөбүлүн ылыы механизмнарын дьүүллэһиэхтэрэ. Маны сэргэ оҕолор төрөөбүт дойдуларын таптыылларын, национальнай үгэстэри, культурнай нэһилиэстибэни ытыктыылларын үөскэтиигэ туһуламмыт «Родничок» диэн оскуола иннинээҕи оҕону патриотическай иитии бырагырааматын олоххо киллэриигэ семинар ыытыллыаҕа.
Балаҕан ыйын 10 күнүгэр форум үлэтэ биэс былаһааккаҕа салҕаныа. Олортон биирдэстэрэ — “Көлүөнэлэр эстафеталара: духуобунас, хорсун быһыы, эппиэтинэс» — ыччат аҕа көлүөнэлэрин уопутун ыччакка тириэрдиигэ, духуобунай сыаннастары бөҕөргөтүүгэ уонна национальнай бэйэни билиһиннэриигэ ананыаҕа. Дискуссияҕа былаас органнарын бэрэстэбиитэллэрэ, учуонайдар, педагогтар уонна уопсастыбаннай деятеллэр тыл этиэхтэрэ.
СВО кыттааччыларын уонна бэтэрээннэрин уонна кинилэр дьиэ кэргэттэрин өйөөһүҥҥэ ураты болҕомто ууруллуоҕа. Экспертэр уонна уопсастыбаннай тэрилтэлэр судаарыстыбаннай өйөбүл дьаһалларын, социальнай көмүскэл механизмнарын уонна бу үлэҕэ гражданскай уопсастыба кыттыытын кыаҕын дьүүллэһиэхтэрэ. Туспа былаһаакка үгэстэри харыстааһыҥҥа уонна бигэ уопсастыбаны үөскэтиигэ элбэх көлүөнэлээх дьиэ кэргэн оруолугар ананыаҕа.
«Уопсастыба көҕүлээһиннэрин оруола» секцияҕа өрөспүүбүлүкэ оройуоннарын уонна куораттарын бастыҥ практикалара билиһиннэриллиэхтэрэ, инициативнай бырайыактар социальнай суолталаах соруктары быһаарыыга хайдах көмөлөһөллөрүн көрдөрүөхтэрэ. Маны сэргэ «Об общих принципах организации местного самоуправления в единой системе публичной власти» диэн саҥа федеральнай сокуону олоххо киллэрии уонна Саха сирин усулуобуйатыгар туһаныы суолларын дьүүллэһии ыытыллыаҕа.
Бырагырааманы пленарнай сүбэ мунньах түмүктүөҕэ, ол кэмигэр делегаттар түмүк оҥоруохтара, резолюцияны ылыахтара.
Тэрийээччилэр “Гражданскай форум – 2025” кэпсэтии уонна бииргэ быһаарыы былаһаакката буолуохтааҕын бэлиэтииллэр.
«Бүгүн историческай өйү-санааны харыстыырга, дьиэ кэргэттэри, бэтэрээннэри өйүүргэ уонна кэлэр көлүөнэлэри сайыннарарга судаарыстыба, уопсастыба уонна хас биирдии гражданин күүстэрин түмэр ордук суолталаах. Форум чопчу этиилэри ырытан, дьону уопсай сыал- сорук тула түмүөҕэ», — диэн тэрийэр кэмитиэт бэрэстэбиитэллэрэ бэлиэтээтилэр.
This post was published on 03.09.2025 17:23 17:23