Дьокуускайга тутуу былассааккатыгар эр киһи дириҥ уонна кыараҕас дьаамаҕа түстэ. Быыһааччылар бу киһини альпинистар тэриллэрин көмөтүнэн таһаардылар.
Саха сирин ЫБМ пресс-сулууспата иһитиннэрэринэн, быһылаан Кульбертинов уулуссатыгар тутуу былассааккатыгар буолбут. Харабыл түүнүн эбийиэги эргийэ сылдьан, хараҥаҕа көстүбэт дириҥ дьаамаҕа түспүт. Эмсэҕэлээбиккэ быыһааччылар бөлөхтөрө көмөҕө кэлбит. 12-15 миэтэрэ дириҥнээх дьааматтан эр киһини альпинистскай оборудование көмөтүнэн таһаардылар.
Кыараҕас сиргэ быыһааччылартан биирдэстэрэ страховкалыыр ситими дьаамаҕа түспүт киһиэхэ иилбит, атына тутан турбут уонна салгыы үөһээ өрө таһаарбыт.
Киһилэрин этэҥҥэ ороон баран, суһал көмө каретатыгар туттардылар.
This post was published on 19.04.2023 11:03 11:03