«Генетика саҥа саҕахтара: персонализованнай медицинаҕа суол» төгүрүк остуолга Россия генетикаҕа, геномикаҕа уонна персонализованнай медицинаҕа бастыҥ исписэлиистэрэ практическай доруобуйа харыстабылыгар инновационнай технологиялары киллэрии стратегиятын оҥоруу боппуруостарын дьүүллэстилэр. Тэрээһин 1 №-дээх өрөспүүбүлүкэтээҕи балыыһаҕа — М.Е. Николаев аатынан медицина Национальнай киинигэр буолла.
«Генетическэй технологиялары сайыннарыы – Саха сирин доруобуйатын харыстабылыгар стратегическай хайысха. Бу өрөспүүбүлүкэ хас биирдии олохтооҕор эрдэ диагностикалааһыҥҥа, көдьүүстээх эмтээһиҥҥэ уонна, саамай сүрүнэ, ыарыыны персональнай сэрэтиигэ күлүүс», — диэн Саха сирин доруобуйа харыстабылын министрин солбуйааччы Татьяна Павлова бэлиэтээтэ.
Медицина Национальнай киинин генеральнай дириэктэрэ Станислав Жирков бэйэтин дакылаатыгар сүрүн сыал-сорук инники генетическэй технологиялары клиническэй практикаҕа интеграциялааһын, үрдүк технологиялаах көмө хас биирдии киһиэхэ, ол иһигэр ыраах уонна Арктика оройуоннарын олохтоохторугар, баар буоларын туһунан тоһоҕолоон бэлиэтээтэ.
Төгүрүк остуолга мегаполис генетическэй сулууспатын кииннээһин уопутун (Москва), геном «темнай материятын» чинчийиини, мэйии искэнин терапиятын (Владивосток) постгеномнай технологиялары, сүрэх-тымыр ыарыыларын геномикатын уонна куттал полигеннаах шкалаларын киллэриини, удьуор ыарыыларын (Уфа) диагностикалыырга геному толору секвенированиелааһын ньымаларын билиһиннэрдилэр.
Ыалдьыттар киин аныгы медицинскэй эбийиэктэригэр сырыттылар уонна хайыы-үйэ практикаҕа киллэриллибит бастыҥ диагностическай уонна эмтиир оборудованиелары кытта билистилэр.
Бүгүн, балаҕан ыйын 3 күнүгэр, кыттааччылары биоинформатикаҕа практика күүтэр, онно исписэлиистэр генетическэй дааннайдары ырытар үөрүйэхтэрин дириҥэтиэхтэрин сөп.
Тэрийээччилэр этэллэринэн, төгүрүк остуолу ыытыы уонна бастыҥ экспертэр кэлэллэрэ билии-көрүү эрэ атастаһыыта буолбакка, Саха сирин уопсай Россиятааҕы научнай-медицинскэй эйгэҕэ интеграциялааһын уһун болдьохтоох бырагырааматын саҕалааһын.
«Бу төгүрүк остуол — Саха сирин доруобуйатын харыстабылын сайдыытыгар саҥа түһүмэх саҕаланар пууна . Федеральнай уопут синергията уонна региональнай уратылары өйдүүрбүт түргэнник персонализированнай медицина бириинсиптэрин киллэриэҕэ уонна өрөспүүбүлүкэ хас биирдии олохтооҕор медицинскэй көмө хаачыстыбатын биллэрдик үрдэтиэҕэ», – диэн Станислав Жирков эттэ.
Тэрээһин дойду президенэ Владимир Путин көҕүлээбит «Уһун уонна көхтөөх олох» национальнай бырайыак сыалын-соругун толорууга туһуланар.
