Дьокуускайга аҕам саастаах дьону сэргэхситэр биир сүрүн уопсастыбаннай тэрилтэнэн куорат биэнсийэлээхтэрин Сэбиэтэ буолар. Түмсүү көхтөөх кыттааччылара саас аайы бу кэмнэргэ буоларын курдук «Сэргэлээхтэрин» остолобуойугар (дириэктэр Наталья Слепцова) муһуннулар. Бырааһынньыктыы киэргэтиллибит саалаҕа бэртээхэй быыстапканы тэрийдилэр, ыллаан дьиэрэттилэр, үҥкүүлээн тэйдилэр, хаартыскаҕа түстүлэр.
Бэрэссэдээтэл Ольга Луговая түмсүүлэригэр быйыл уон саҥа киһи кэлбитин билиһиннэрдэ, интэриэстэринэн кулууптар үлэлэрэ салҕанарын, куорат тэрээһиннэригэр кыттыахтаахтарын иһитиннэрдэ. Сэбиэт көхтөөх кыттааччыта Антонина Кузьмина маннык түмсүү улахан туһалааҕын бэлиэтиир. «Бу курдук мустан санааны атастаһан, төрөөбүт күннэри бэлиэтээн, улуустарга баар түмсүүлэри кытта сибээстэһэн, көрсөн, олохпутун сэргэхситэбит. Бары биир дьиэ кэргэн курдукпут», — диэн этэр. Куруһуоктарга кыттан, элбэх киһи талаана арыллыбытын бэлиэтиир.
Кинилэр этиилэрин үлэ, тыыл бэтэрээнэ, 85-с хаарыгар үктэммит Иннокентий Лазарев бигэргэтэр. «Аммаҕа ааҕар балаҕантан саҕалаан өр кэмҥэ култуура эйгэтигэр үлэлээбит киһи, дьоно-сэргэтэ суох табыллыбаппын. Хата, бу Сэбиэти буламмын улаханнык аралдьыйдым. Манна кэлэн саахыматтыыбын, дуобаттыыбын, хабылыктыыбын, ырыаҕа, үҥкүүгэ кыттыһабын. Күрэхтэһиилэргэ миэстэлэһэбин. Билэр дьонум хайгыыллар. Бу Сэбиэккэ киһи ыалдьарын, чуҥкуйарын умнар», — диэт, мичээрдиир.
Үлэ, тыыл бэтэрээнэ, 87-лээх Варвара Прокопьева бу күн үҥкүүлээн тэйдэ. Ытык кырдьаҕас оһуохайдаатаҕына, ыллаатаҕына күүс-уох киирэргэ дылы буоларын этэр. Онтон дьоруой ийэ Софья Терентьева тэрээһиннэргэ көхтөөхтүк кыттан оҕолоругар, сиэннэригэр, хос сиэннэригэр үтүө холобур буоларыттан үөрэр. Кини маны сэргэ, тыа сиригэр үлэлиир кырдьаҕастар түмсүүлэрин кытта сибээһи туталларыттан, саастыылаахтарын кытта көрсөллөрүттэн ордук астынарын бэлиэтиир.
Бу күн Людмила Волжанинова салайар бөлөҕүн уран тарбахтаахтара оҥорбут үлэлэринэн быыстапка буолла. Манна баайыы сэлээппэттэн, суумкаттан, былааттан саҕалаан, дьэрэкээн сибэкки дьөрбөтүгэр, куукулаҕа, хаһаайыстыбаҕа туттар мал-сал арааһыгар тиийэ тикпиттэрэ, оҥорбуттара, быысыбайдаабыттара болҕомтону улаханнык тарта.
