15 От ыйа 15.07
  • 18°
  • $ 87,74
  • 95,76

Дьокуускайга “Белая Роза - Саха” дьахталларга анаммыт медицинскэй киин аһылынна

13:10, 09 сентября 2016
Читайте нас на
Яндекс Новости
ЯДВ

Дьокуускайга Маяковскай аатынан уулусса 84-гэр дьахтар ууһуур уорганнарын уонна эмий онкологическай ыарыыларын эрдэттэн быһаарар  “Белая Роза — Саха” медицинскэй киин аһылынна. Өрөспүүбүлүкэ олохтоохторо манна босхо көрдөрүнэр кыахтаахтар.


Бу бырайыак өссө 2010 сылга Светлана Медведева көҕүлээһининэн саҕаламмыта. «Матери России» Саха сиринээҕи салаата (салайааччы Прасковья Борисова) өйөөһүнүнэн олоххо киирдэ.

Маннык кииннэр Россия араас муннуктарыгар аһыллыбыттара. Саха сиригэр бу бырайыак Уһук Илиҥҥэ үсүһүнэн аһылынна.

Медицинэ киинин үөрүүлээхтик аһыы сиэригэр-туомугар өрөспүүбүлүкэ вице-премьерэ Александр Соловьев, доруобуйа харыстабылын миниистирэ Михаил Охлопков, «Матери России» Саха сиринээҕи салаатын салайааччыта Прасковья Борисова, Москватааҕы «Белая Роза» аһымал фонда генеральнай дириэктэрэ Дарья Крючко ыалдьыттаатылар.

«Уопсастыба уонна судаарыстыба хардарыта дьайсыылаах көдьүүстээх үлэлэринэн маннык 13 киин үлэтин саҕалаата. Саха сиригэр бу үлэ саҕаламмытыттан үөрүүбүт муҥура суох. Төһөнөн элбэх дьахтар, ийэ манна көрдөрүнэн да, соччонон элбэх олоҕу быыһыахпыт», — диир Дарья Крючко.

Киин уопсастыбаннай, коммерческайа суох элбэх тэрилтэлэр, көхтөөх дьон өйөбүллэринэн Саха сиригэр баар буолбутун Александр Соловьев бэлиэтээн эттэ.

«Нэһилиэнньэ ахсаанан элбэтии, олох таһымын үрдэтии курдук судаарыстыба инники күөҥҥэ тутар соруктарыгар коммерческайа суох тэрилтэлэр кыттыһалларыттан үөрэбин. Киин дьон-сэргэ доруобай буолуутугар сүрүн олугу ууруоҕа», — диэтэ кини.

Михаил Охлопков салайар доруобуйа харыстабылын министиэристибэтэ киини өйүөн туһунан эттэ. «Саха сиригэр эмп тэрилтэлэригэр салгыы чинчийиини уонна эмтэниини ааһар дьону көрөр-истэр, сүбэлиир-амалыыр, уйулҕаларыгар көмө буолар дьон үлэлиэхтэрэ», — диэтэ кини.

Кииҥҥэ балаҕан ыйын 11 күнүттэн саҕалаан сарсыарда 09:00 чаастан 15:00 чааска диэри маммолог, гинеколог сүбэлэрин ылыахха сөп. Ону таһынан аныгы оборудованиеҕа скрининговай диагностыыр чинчийиини ааһыахтара.

«Манна биир күн маммография уонна онкоцитологя босхо оҥоһуллуоҕа. Бу рак ыарыыны быһаарар соҕотох ньыма. Дьахталлар пааспардаах уонна полистаах кэлиэхтээхтэр«, — диэтэ «Белая Роза-Саха» кылаабынай бырааһа Яна Радь.

Следите за самым важным и интересным в Telegram-канале и WhatsApp-группе ЯСИА