"Биһиги дьыалабыай көрсүһүүбүт кэмигэр Владимир Александрович Саха сирин ИДЬМ үлэтин үрдүктүк сыаналаата. Ордук Уһук Илин уонна Россия таһымнарыгар Саха сиригэр буруйу арыйыы үрдээһинин бэлиэтээтэ. Кибермасыанньыктааһыны утары холбоһуктаах үлэни күүһүрдэргэ дуогабардастыбыт, маны сэргэ ис дьыала органнарын, чуолаан, өрөспүүбүлүкэ арктическай оройуоннарыгар материальнай-техническэй базатын бөҕөргөтүүгэ», — диэн Саха сирин баһылыга бэйэтин телеграм-ханаалыгар иһитиннэрдэ. Саха сирэ буруйу оҥорууну эрдэттэн барыллаан силиэстийэлээһинин ахсаана элбээн иһэр, уон регион ахсааныгар киирдэ. Буруйу оҥоруу уопсай арыллыыта 57,8% тэҥнэстэ, бу Уһук Илин уонна Россия орто көрдөрүүтүн балачча куоһарар. Владимир Колокольцев Айсен Николаевка бииргэ үлэлииргэ махтанна уонна «Саха Өрөспүүбүлүкэтигэр сокуону кэһиини сэрэтэр» бырагыраама чэрчитинэн региональнай бюджет суотугар тэриллибит миграция уонна суол-иис куттала суох буолуутугар биир кэлим киини үрдүктүк сыаналаата. Бүгүн ити бырагырааманан Нерюнгри оройуонун Иенгра сэлиэнньэтигэр полиция (ГАИ) поһа тэриллэр. Билигин Өлөөн сэлиэнньэтигэр анаан модульнай административнай дьиэ тиэрдиллэр.