Өрөспүүбүлүкэтээҕи 3№-дээх клиническэй балыыһа иһинэн Сиэстэрэ көрүүтүн-истиитин салаатыгар быйылгы саҥа дьыллааҕы харыйаны симиир киэргэллэри кырдьаҕастар бэйэлэрэ, Ева Борисовна Матвеева ыйыытынан – кэрдиитинэн уонна көмөтүнэн оҥордулар. Ол туһунан салаа сэбиэдиссэйэ Валентина Поликарповна Дьяконова кэпсээтэ.
Балыыһа харыйатын симэхтэрэ — саастаах дьон хас да күннээх үлэлэрин түмүгэ. Оонньуурдар туойтан, кумааҕыттан оҥоһуллубуттар. Туойу быһыылаан-таһаалаан, куурдан-хатаран, онтон кырааскалаан, харыйаҕа ыйыыр быалаан, хас да күн сыралаһан, бэртээхэй харыйа киэргэллэригэр кубулуппуттар.
“Биһиги отделениебыт харыйатын киэргэтиитэ үгүс киһи болҕомтотун тарта, сэҥээриитин ылла. Тоҕо диэтэххэ, харыйаны пациеннарбыт бэйэлэрин илиилэринэн оҥорбут оонньуурдарынан киэргэппиппит. Кырдьаҕастар үөрүүлэрэ үгүс. Эдэр сааспытын санаатыбыт, тарбахтарбытын хамсаттыбыт, өйбүтүн үлэлэттибит диэтилэр. Хас да дьарык буолла. Онон балыыһа саҥа дьыллааҕы харыйатын араас кыыллар, фигуркалар, кумааҕыттан кырыллыбыт хаар кыырпахтара киэргэтэллэр. Таһырдьа тэлгэһэбитигэр кыра харыйалаахпыт, онтубутун араас өҥнөөх муус оҥоһуктарынан симээбиппит”, — диэн Валентина Дьяконова киэн тутта сэһэргээтэ. Кини кырдьаҕастары көрөөччү-истээччи Ева Борисовна Матвееваҕа уонна «Долгожить» тэрилтэ директорыгар Наталия Алексеевна Каратаеваҕа ис сүрэҕиттэн махталын биллэрдэ.
Өрөспүүбүлүкэтээҕи 3№-дээх клиническэй балыыһа иһинэн Сиэстэрэ көрүүтүн-истиитин салаата 2021 сыл алтынньы 1 күнүттэн арыллан үлэлиир. Бу салааҕа, сүнньүнэн, паллиативнай – эмтэммэт ыарыылаах, уустук диагнозтаах, күнүстэри-түүннэри көрүү-истии эрэйиллэр саастаах дьон сыталлар. Аламаҕай санаалаах балыыһа салаатын үлэһиттэрэ «Долгожить” коммерческайа суох ойдом тэрилтэ салайааччыта Наталия Каратаеваны уонна волонтердары кытта өрүү кырдьаҕас дьон сүргэтин көтөҕө, сэргэхситэ сатыыллар.
Ааптар: Яна Байгожаева
