Дьокуускайга полиция үлэһиттэрэ баан биир сотрудницата клиеннарга сыһыаннаах масыанньыктааһын хас да түбэлтэтин оҥорбутун арыйдылар. 29 саастаах тэрилтэ үлэһитэ клиеннэр счеттарыттан харчыларын уорбут, уопсай суумата 110 тыһыынча солк. Ол туһунан ИДьМ Саха сиринээҕи салаатын пресс-сулууспата суруйда.
Эмсэҕэлээччи хаста да счетуттан харчыта сүппүтүн биллэрбит.
«Дьахтар бу бааҥҥа кирэдьиит оҥорбут, ити эрээри сотору кэминэн кини кирэдьиитин счета атын бааҥҥа көһөрүллүбүт. Ол туһунан умнубут, итиэннэ үөрүйэҕинэн кирэдьиит ылбыт реквизитыгар 20-чэ тыһыынча солкуобайы кирэдьиитин сабыыга ыыппыт, ити эрээри харчыта сүппүт», — ИДьМ кэпсээтилэр.
Полиция үлэһиттэрэ бу бастакы түбэлтэ буолбатаҕын быһаардылар. Счеттарыттан уонча киһи харчытын сүтэрбит. Холуобунай дьыала тэрилиннэ, РФ ХК 159 ыст. 3 ч. — масыанньыктааһын.
Барыллаан быһаарыллыбытынан, баан үлэһитэ дьон кирэдьиитин сабыыга ыыппыт харчытын ордугуттан счекка хаалбыт харчыны уорбут.
This post was published on 23.04.2025 12:15 12:15