19 Тохсунньу 19.01
  • -48°
  • $ 73,82
  • 83,32

Егор Борисов: Азия дойдуларын физикаҕа олимпиада кыттааччыларыгар үтүө түмүгү баҕарабын

09:30, 03 мая 2017
Текст:

Бу күннэргэ Азия 24 дойдутун физикаҕа саамай күүстээх 169 ыччата Дьокуускай куоракка муһунна. Азия дойдуларын физикаҕа олимпиадата 2000 сылтан саҕалаан ыытыллар. Оттон Арассыыйаҕа аан маҥнайгытын тэриллэр.


Бүгүн ХИФУ “Сэргэлээх уоттара” култуура киинигэр тэрээһини үөрүүлээх быһыыга-майгыга астылар. Виртуоз-хомусчут Ольга Подлужная тэтимнээх тардыыта, “Саха сирин виртуозтара” скрипачтар ансаамбыллара көрөөччүлэр куттарын тутта. “Сюрприз”, “Тетрис”, “Версия”, “Сандал” ансаамбыллар өрө көтөҕүүлээх үҥкүүлэрэ саала иһин үөрүүнэн толордо.

СӨ Ил Дархана Егор Борисов тыл этиэн иннинэ, Азия дойдуларын физикаҕа олимпиадата аан дойду саамай улахан дойдутугар – Арасыыйаҕа, саамай улахан региоҥҥа – Саха сиригэр ыытыллар диэн бэлиэтээтэ. «Мин норуотум туочнай науканы сэргиир. Биһиэхэ физика-математика сайдыытын хамсааһына 50-тан тахса сыллааҕыта саҕаламмыта. Төрүттээччинэн өссө Сэбиэскэй Сойуус норуодунай учуутала М.А.Алексеев буолар. Бу күннэргэ уһулуччу, биллиилээх учууталбыт төрөөбүтэ 100 сылын бэлиэтээри олоробут. Тэрийээччилэргэ, олимпиада бэрэсидьиэнигэр, профессор господин Леон Чуань Квекка махталбытын биллэрэбит. Улахан эппиэтинэстээҕин өйдүүбүт. Саха сирэ норуоттар икки ардыларынааҕы таһымнаах тэрээһиннэри, оонньуулары ыытыыга уопуттаах. Дьокуускай куоракка улахан спортивнай, интеллектуальнай оонньуулары тэрийэбит. Биһиги норуоттар икки ардыларынааҕы таһымҥа тахсарга дьулуһабыт. Бүгүн биһиэхэ оннук кыах бэрилиннэ. Олимпида кыттааччыларыгар барыларыгар үтүө түмүгү баҕарабын!», — диэтэ Егор Борисов.

Кыргызстан техничническэй университетын физикаҕа хаапыдыратын преподавателэ, хамаанда салайааччыта Раиса Сунтаналиева: “Физика уустук наука. Кыргыттар букатын аҕыйахтар. Тустаах олимпиада былаһын тухары, биһигиттэн 3 эрэ кыыс кыттыбыта. Быйыл бары уолаттар. Азия олимпиадатыгар 10-с төгүлүн, норуоттар икки ардыларынааҕыга 15-тэ кыттан турабыт. Киһи мыыммат ситиһиилэрдээхпит. Былырыын үөрэнээччим Швейцарияҕа ыытыллыбыт норуоттар икки ардыларынааҕы 48-с олимпиадаҕа үһүс миэстэни ылан турар. Азиятааҕы олимпиада улахан суолталаах, тарбахха баттанар тэрээһин. Китай, Индия, Индонезия дойдулара физикаҕа олус күүстээхтэр. Ол да буоллар, биһиги миэстэлэһэргэ эрэллээхпит.

Саха сиригэр аан маҥнайгытын кэллибит. Бэйэбит дойдубутугар сылдьар курдук сананныбыт. Тоҕо диэтэххэ, микрооройуоннара, тутуулара майгыннаһаллар. Бишкек эмиэ Дьокуускай куорат курдук. Билигин Бишкеккэ 30 кыраадыс сылаас, үүнээйи саамай силигилии ситэн, тыллан турар кэмэ. Манна тымныы эбит. Ил Дархаҥҥыт эппитин курдук, 71 кыраадыска диэри тиийэ тымныйар буоллаҕына, хорсун эрэ дьон олорор дойдулара эбит. Скрипачтаргыт бэркэ оонньоотулар уонна опернай ырыаһыккыт олус үчүгэйдик ыллаата”, — диэн санаатын үллэһиннэ.

Кыргызстан хамаандата

Онтон Австралия хамаандатын кыттааччыта Кира Неймо: «Дьокуускай куоракка икки күн анараа өттүгэр кэлбиппит. “Триумф” спортсменнары бэлэмниир киин гостиницатыгар түһэрбиттэрэ. Олус интэриэһинэй дойдуга олорор эбиккит. Австралия куораттарыттан букатын ураты. Биллэн турар, халлааҥҥыт тымныы. Билигин биһиэхэ 20-30 кыраадыс сылаас. Дьокуускайга тымныы диэн эрдэттэн сэрэппиттэрэ, ол иһин халыҥнык таҥнан кэлбиппит. Билиҥҥитэ түспүт сирбититтэн улаханнык ыраата иликпит. Сүнньүнэн “устудьуоннар куораттарын” эрэ көрдүбүт диэххэ сөп. Манна кэлиэхпит иннинэ хас даҕаны сүүмэрдиир күрэхтэһиини ааспыппыт. Бары даҕаны дойдубут араас таһымнаах олимпиадаларын кыайыылаахтара буолабыт. Тус бэйэм, олимпиада кэмигэр өйбүн-санаабын барытын күүскэ уурар санаалаахпын. Ол эрээри, саамай сүрүнэ – кыттыы. Инникитин олохпун математиканы, инженерияны кытта ситимниэхпин баҕарабын. Австралия бастыҥ университетыгар үөрэнэ киирэргэ дьулуһабын”, — диэн улахан киһилии бэрт дуоспуруннаахтык хоруйдуур.

Олимпиадаҕа барыта 24 (22 тас дойду) хамаанда кыттар. 245 киһи кэлбититтэн, 169 кыттааччы, 43 салайааччы, 32 кэтээн көрөөччү, 1 ыалдьыт. Арасыыйа аҕыстыы киһилээх икки хамаанданы туруорар. Манна Саха сириттэн 3 оҕо киирэрэ биллэр.

edersaas.ru

0
0
19 января 19.01
  • -48°
  • $ 73,82
  • 83,32