Презентациялыыр трилогияны оҥорооччунан историческай наука кандидата, РНА СС гуманитарнай чинчийии уонна аҕыйах ахсааннаах хотугу омуктар кыһалҕаларын үөрэтэр институт старшай научнай үлэһитэ Наталья Данилова буолар.
«”Андрей Андреевич Саввин. Талыллыбыт үлэлэр» трилогия саҥалыы тыыннанан бэлэх таһаарыыта буолар. Онно номнуо бестселлер буолбут Саввин урут тахсыбыт үс кинигэтэ киллэрилиннэ. Бастакы кинигэтэ “Пища якутов до развития земледелия» 2005 сыллаахха күн сирин көрбүтэ. Иккис кинигэтэ “Верхоянские якуты» Андрей Саввин 1939-1940 сылларга фольклорнай диалектологическай экспедиция кэмигэр хомуйбут матырыйаалларыгар олоҕуран оҥоһуллубута. Бу кинигэ саха тылынан 2022 сыллаахха тахсыбыта, билигин нуучча тылынан киирдэ. Үһүс кинигэтэ — “Гончарное ремесло у якутов» эмиэ 2022 сыллаахха бэчээттэммитэ. 2025 сыллаахха кинигэлэр көннөрү хаттаан бэчээттэммэккэ, научнай ырытыыларынан, иллюстрацияларынан уонна бэлиэтээһиннэринэн эбилиннилэр. Кинигэлэри хаттаан бэчээттээһини үбүлээһини Дьааҥы уонна Чурапчы улуустара, ону тэҥэ биһиги институппут ыллылар», — диэн кэпсээтэ Наталья Данилова.
Ыспыраапка: Андрей Саввин Саха уобалаһын Баатара (Чурапчы) улууһун 2-с Хатылы (Болтоҥо) нэһилиэгэр 21.11.1896 сыллаахха төрөөбүтэ. Дьокуускайдааҕы реальнай училищеҕа үөрэммитэ. 1918-1919 сс. — революционнай куруһуоктар чилиэннэрэ. Бу сылларга Баатара улууһугар чааһынай оскуола арыйбыта. 1937 сыллаахха САССР СНК иһинэн тыл уонна култуура институтугар ыҥырыллыбыта. 1938-1939 сылларга Саха сирин оройуоннарын Бүлүү бөлөҕөр фольклорнай-диалектологическай экспедиция оҥорбута. Кини кэмигэр историческай үһүйээннэри, остуоруйалары, ырыалары суруйбута. 1939-1940 сс. — Тыл уонна культура институтун хотугу фольклор-диалектическай экспедициятын кыттыылааҕа, ол кэмҥэ Дьааҥы, Абый уонна Аллайыаха оройуоннарынан матырыйааллары хомуйбута. 1948-1951 сс. — Чурапчы кыраайы үөрэтэр музейын дириэктэрэ.
This post was published on 05.02.2026 16:20 16:20