Национальнай библиотекаҕа анал байыаннай дьаһалга ытык иэстэрин төлүү сылдьар медицина үлэһиттэригэр анаммыт экспозициялаах быыстапка арылынна. Манна трофейнай мал-сал, аптечкалар, бойобуой саа-саадах чаастара, байыаннай припастар, снаряжениелар, наҕараадалар уонна да атыттар бааллар.
Быыстапка Аҕа дойду буойуттарын дьиэ кэргэттэрин кэмитиэтин регионнааҕы салаатын кытта тэрилиннэ. «Живи!» быыстапка арыллыытыгар байыаннай сулууспалаахтарга, кинилэр кэргэттэригэр, ийэлэригэр түөскэ кэтэр бэлиэлэри, махтал суруктары туттардылар.
Экспозиция ытык иэстэрин толоро сылдьар буойуттарга анаммыт «Время выбрало нас» быыстапка салгыытынан буолар.
Экспонаттары байыастар чугас дьонноро, «Саха сирэ эйигин кытта!» өрөспүүбүлүкэтээҕи уопсастыбаннай хамсааһын штаба, Ярославскай аатынан музей тиксэрдилэр.
