Дьокуускайга сылы эргиччи үлэлиир аквапаарканы концессионнай сөбүлэһиинэн тутарга былаанныыллар. Ол туһунан тохсунньу 23 күнүгэр социальнай ситимнэргэ быһа эфир кэмигэр Саха сирин баһылыгын иһинэн архитектура уонна куорат тутуутун управлениетын салайааччыта Любовь Папок иһитиннэрдэ.
«Концессионнай сөбүлэҥҥэ илии баттыыр былааннаахпыт, номнуо миэстэ быһаарылынна – паарка таһынааҕы сир көрүллэр. Куорат дьаһалтата архитектура управлениетын уонна өрөспүүбүлүкэ бырабыыталыстыбатын кытта бииргэ үлэлиир, онон сотору саҥа эбийиэк баар буолуо диэн эрэнэбин», – диэтэ кини.
Любовь Папок маны сэргэ өрөспүүбүлүкэ уонна куорат таһымнарыгар куораты тутар сэбиэттэр оруолларын тоһоҕолоон бэлиэтээтэ, онно бары бырайыактар профессиональнай уопсастыбаны кытта дьүүллэһиллэр уонна этиилэр бэриллэллэр. Ити куорат тутуутун быһаарыыларын үрдүк хаачыстыбатын хааччыйар уонна территориялар сайдыыларын бары өрүттэрин учуоттуур кыаҕы биэрэр.
Маны таһынан Саха сирин кылаабынай архитектора өрөспүүбүлүкэҕэ «Инфраструктура для жизни» национальнай бырайыак чэрчитинэн саахалланар дьиэлэртэн көһөрүүгэ уонна территориялары кэлимник сайыннарыыга улахан бырайыактар олоххо киирэллэрин бэлиэтээтэ. Тутууга аныгы тупсаҕай уонна табыгастаах куорат эйгэтин үөскэтиигэ саҥа ньымалары киллэрэр стандартар учуоттаналлар.
Санатан эттэххэ, Саха сиригэр 36 саҥа уопсастыбаннай сир 2026 сылга баар буолуоҕа.
