“Олоххун уларыт!” аахсыйаны 13-с төгүлүн Дьокуускайга ыарахан балаһыанньаҕа түбэспит дьоҥҥо ыыттылар. Көмө көрдөөн 50 киһи, ол иһигэр бэйэлэрин оҕолоруттан сылтаан, дьиэтэ суох хаалбыт кырдьаҕас дьон аан бастакытын кэллилэр. Бу туһунан Саха сиригэр киһи быраабыгар боломуочунай пресс-сулууспатыгар кэпсээтилэр.
Наадыйааччылар дерматовенерологтар, наркологтар уонна фтизиатр консультацияларын ыллылар. Чинчийии түмүгүнэн 11 киһини стационарга диагностикаҕа ыыттылар.
«Быйыл ордук болҕомто психологическай өйөбүлгэ уурулунна. 36 киһи психологтартан сүбэ-ама ылла. Ардыгар биир истиҥ кэпсэтии, тыл этэр, истэр кыах материальнай көмөттөн итэҕэһэ суох суолталаах. Бу киһи бэйэтигэр, бэйэтин күүһүгэр итэҕэлин төнүннэрэригэр көмөлөһөр», — диэн аахсыйа тэрийээччилэрэ бэлиэтииллэр.
Ону таһынан «Линия жизни» уонна «Маяк помощи» пуондалар чопчу олорор сирэ суох дьоҥҥо пааспардарын хаттаан оҥорторорго көмөлөстүлэр. Түөрт киһиэхэ номнуо саҥа докумуоннарын туттардылар, өссө алтата алтынньы 9 күнүгэр ылыахтаах. Пааспардаммыттар үлэ булан, социальнай төлөбүрдэри ылан, уопсайынан гражданин бары быраабын туһаныахтара.
Аахсыйа чэрчитинэн исписэлиистэр 17 киһини үлэнэн хааччыйыыга сүбэлээтилэр. Икки кыттааччы дохуот ылар сири таһынан, Хаҥалас оройуонун бааһынай хаһаайыстыбатыгар олорор дьиэни буллулар. Өссө уон киһи приюкка миэстэ биэрэргэ көрдөстө, олортон икки киһи хайыы-үйэ олус наадалаах өйөбүлү ылары ситистэ.
“Олоххун уларыт!” (урут «Путь домой» дэнэрэ) Дьокуускайга 2018 сылтан ыытыллар. Бырайыагы тэрийээччилэр — ИДЬМ регионнааҕы управлениетын кытта Саха сиригэр киһи быраабыгар боломуочунай.
This post was published on 08.10.2025 18:38 18:38