Дьокуускай уулуссаларын уонна суолларын ситимин өрөмүөннүүр эбийиэк тутуутун бэлэмнэрэ 65% — ҥа тиийдэ. Ол туһунан «Главстрой» МКУ суол тутуутун отделын начаалынньыга Павел Сидоров «Актуальнай интервью» бырагыраамаҕа иһитиннэрдэ.
Сидоров этэринэн, билигин инженернэй коммуникацияларга саамай уһун кэмнээх үлэ түмүктэнэр. Атырдьах ыйыгар бэдэрээччиттэр аспаал-бетон сабыыны оҥорууга тахсыахтара.
«Бүгүҥҥү күҥҥэ үс эбийиэккэ тутуу-таҥыы үлэтэ барыта түмүктэннэ: иккитэ Тулагино микрооройуонугар уонна биирэ Сыырдах сэлиэнньэтигэр. Аахталарга илии баттанна, үлэҕэ туттарабыт», – диэн Павел Сидоров чуолкайдаата.
Ону сэргэ Белинскай, Севастопольскай, Бестужев-Марлинскай, Лиза Чайкина, Ленскэй, Сергеляхскай шоссе, Капитоновкаҕа Заречная уулуссалара уонна Хатаска элбэх оҕолоох ыаллар кыбаарталларыгар киирэр суоллар өрөмүөннэнэллэр. Эбийиэктэри киллэрии 2025 сыл алтынньытыгар былааннанар. Үлэ «Инфраструктура для жизни» национальнай бырайыак чэрчитинэн ыытыллар.
Павел Сидоров Ойуунускай уонна Хабаровскай уулуссаларын хапытаалынай өрөмүөннээһини туспа бэлиэтээтэ. 2027 сылга диэри салҕаныахтара. Ону таһынан быйыл сайын Сэбиэскэй Армия 50 сыллаах уулуссатын саҥардыы саҕаламмыта.
Суол үлэтин хаачыстыбатын хонтуруоллуур үлэ ыытыллар. Кэһиилэр көһүннэхтэринэ итэҕэстэри туоратарга сорудах бэриллэр. “Хас биирдии муниципальнай дуогабарга мэктиэ болдьоҕо сурулунна: суол үөһээ араҥатыгар түөрт сыл, аллараа — биэс сыл, буоругар — аҕыс сыл”, – диэн тоһоҕолоон бэлиэтээтэ Сидоров.
2030 сылга диэри суол ситимин өрөмүөннээһин былааннарын суол инфраструктуратын уонна тырааныспарын департамена оҥорор. Суол туругун, өрөмүөннэр ардыларынааҕы болдьохтор, дьон этиитэ уонна сүрүн магистраллар приоритеттара учуоттанар.
This post was published on 13.08.2025 12:33 12:33