Дьокуускай баһылыга Евгений Григорьев Ярославскай уонна Кулаковскай уулуссалар быһа охсуһууларыгар баар баһаартан эмсэҕэлээбит урукку эр дьон прогимназиятын мас дьиэтин муниципальнай бас билиигэ биэрэр көҕүлээһини эттэ.
«Дьиэни Дьокуускай бас билиитигэр биэрии боппуруоһун ааспыт нэдиэлэҕэ культура уонна духуобунай сайдыы министиэристибэтин салалтатын кытта көрсүһүүгэ кэпсэттилэр. Дьиэни чөлүгэр түһэриэххэ сөп, [бырайыактыыр-сметнай докумуоннар] хайыы- үйэ оҥоһуллубуттар», — диэтэ баһылык тохсунньу 19 күнүгэр куорат сүбэ мунньаҕар.
Саҥардыллыбыт дьиэҕэ Дьокуускай куорат музейын экспозициятын олохтуурга этии киллэриллэр.
Реконструкция «Старый город-2» бырайыагы кытта дьүөрэлэһиэҕэ. Былырыын Дьокуускай куорат музейа туспа юридическай сирэй быһыытынан регистрацияламмыта бэлиэтэнэр.
Санатан эттэххэ, «Старый город-2» бырайыак — бу “Залог” оройуонугар түмүллүбүт Дьокуускайдааҕы историческай көстүүнү чөлүгэр түһэриигэ уонна харыстааһыҥҥа киэҥ далааһыннаах көҕүлээһин буолар. 2025 сыллаахха ону олоххо киллэрэргэ норуот облигацияларын туһанарга быһаарыы ылыллыбыта.
This post was published on 19.01.2026 11:03 11:03