BellaBot, улахан экран-харахтаах кэрэ көстүүлээх робот, остуоллар икки ардыларыгар сатабыллаахтык хамсанар, дьуһуурунай үөрэнээччилэргэ аһы-үөлү таһарга көмөлөһөр.
«Кини сүрүн соруга – оскуолаҕа дьуһуурунайдыыр оҕолорго аһы-үөлү таһарга көмөлөһүү. Оҕолор үөрдүлэр, процесс түргэнник оҥоһуллар, интэриэһинэй. BellaBot диэн навигация систиэмэлэринэн, мэһэйдэри туоруур датчиктарынан уонна хас да поднос уурар полкаларынан хааччыллыылаах өйдөөх массыына. Кини оҕолору, остуоллары таарыйбакка, эрдэттэн бэриллибит картанан бэйэтин маршрутун оҥостор кыахтаах”, — диэн кэпсээтэ “ЦРО» МАУ дириэктэрэ Варвара Кычкина.
Робот бэриллибит туочукаларынан бэйэтэ сылдьыан (үллэрии → остуоллар), хас да подноһу тэҥҥэ тиэйиэн сөп уонна датчиктар уонна сымнаҕас бампер көмөтүнэн, охсууну уонна эчэйиини таһаарбат. Ону таһынан «Сэрэниҥ, итии!» диэн саҥаран биллэрэр.
Дьокуускайдааҕы үөрэх Управлениетын начальнига Мария Петрова: « BellaBot үөрэнээччилэригэр робототехника уонна автоматизация олох саамай көннөрү эйгэлэригэр интеграцияламмыттарын, оҕолору технологиялары үөрэтиигэ көҕүлээһиннэрин чахчы холобура», — диэн бэлиэтээтэ.
BellaBot 40 № – дээх оскуолаҕа кэлиитэ — бу сервис роботизациятын глобальнай тенденциятын сорҕото. Бу холонон көрүү киириитэ оскуола инфраструктуратын уонна күннээҕи үлэ усулуобуйатыгар технология көдьүүһүн сыаналыаҕа.
Ситиһиилээх буолар түгэнигэр, маннык өйдөөх көмөлөһөөччүлэр куорат атын оскуолаларыгар эмиэ көстүөхтэрин сөп.
