Дьокуускай оскуолаларыгар 1 — 4 кылаас үөрэнээччилэрэ биирдэ аһыылларыгар 138 солк, оттон 5 — 11 кылаастарга — 120 солк көрүллэр. Доруобуйаларыгар хааччахтаах оҕолор (ВОЗ) иккитэ аһыыллар, диэн суруйда ЯСИА саайта.
Инфографика: ЯСИА саайта
«ЦРО» МАУ иһитиннэрбитинэн, суума судаарыстыба уонна муниципалитет үбүлээһиниттэн тутулуктаах, онно бородуукта атыылаһыыта, повардар хамнастара, сууйар сириэстибэ уонна да атын ороскуоттар киирсэллэр.
Босхо аһыыллар: 1–4 кылаас үөрэнээччилэрэ бары; элбэх оҕолоох дьиэ кэргэттэр оҕолоро; доруобуйаларыгар хааччахтаах оҕолор; тулаайах уонна төрөппүт көрүүтэ-истиитэ суох хаалбыт оҕолор; кыаммат уонна социальнай туруга суох ыаллар оҕолоро, инбэлиит төрөппүттээх оҕолор, байыаннай сулууспалаахтар оҕолоро; сулууспалыы сылдьан олохторун толук уурбут дьон оҕолоро.
Босхо аһылыкка киирэр: итии бүлүүдэ (миин, хааһы, гарнирдаах эт уонна балык бүлүүдэлэр), килиэп уонна бурдук аһа, утах (чэй, какао, хомпуот, муорус), маны сэргэ буруукта, оҕуруот аһа уонна үүт ас.
