«Төрөппүттэр, биллэн турар, оҕолорун оскуола ыыппат бырааптаахтар, ити эрээри быраабы араҥаччылыыр уорганнар иһитиннэриилэринэн, куттал суох. Суоһурҕаныылаах иһитиннэриилэр туһааннаах тэрилтэлэринэн тута бэрэбиэркэлэнэллэр, мониторинг уонна хонтуруол ыытыллар, оскуолаларга тохтоло суох дьуһуурустуба олохтонор», — диэтэ ЯСИАҕа Мария Петрова.
Кини эппитинэн, бэнидиэнньик сарсыарда оскуолаҕа үөрэнээччи ахсаанын 70% кэлбит. Сүрүннээн кыра кылаас оҕолоро кэлбэтэхтэр.
Санаттахха, олунньу 2 күнүгэр Тулагы оскуолатыгар мина ууруллубутун туһунан сурах тарҕанар. Бээтинсэҕэ маннык иһитиннэрии Дьокуускай №17-дээх оскуолатыгар диэн буолар. Кэлин биллибитинэн, иһитиннэриилэр иккиэн сымыйа буолаллар.
ИДьМ бэлиэтээбитинэн, терроризм туһунан сымыйа иһитиннэрии иһин РФ Холуобунай кодексатынан эппиэтинэс көрүллэр, буруйдаах 10 сылга дылы болдьоҕо быһыллыан сөп.
This post was published on 03.02.2025 12:08 12:08