Дьокуускай куорат оҕо саадтара үгэс быһыытынан үлэлииргэ бэлэмнэнэллэр. Үөрэх управлениетын салайааччы Алексей Семенов бирикээһинэн коронавирус инфекцията тарҕанар кэмигэр инструктивнай-методическай сүбэлэр бэлэмнэммиттэр.
Оҕо саадтара аһыллыахтарын иннинэ генеральнай уборка оҥоһуллуо, салгылатыы систиэмэлэрин ыраастыахтара, дезинфекциялыахтара.
Саакка киириигэ күнүн аайы «сарсыардааҥҥы фильтр» оҥоһуллуо: оҕолор, төрөппүттэр, детсад үлэһиттэрин температураларын кээмэйдиэхтэрэ.
Коронавирус инфекцията тарҕамматыгар төрөппүт оруола улахан буолуо. Хас биирдии бөлөх туһунан ааннаах буолуо, оҕолор таҥнар сирдэригэр биэстэн элбэх буолан мустубаттарын туһугар кэлии-барыы кыраапыктаныа. Төрөппүттэр детсад территориятыгар маасканы кэтэллэрэ ирдэниэ.
Оҕо саадыгар үлэлээбэт, туора дьон детсадка сылдьара бобуллуо.
Оҕолору иитии-үөрэтии тус туһунан бөлөхтөрүнэн барыа, маассабай тэрээһиннэр бобуллаллар. Бөлөхтөрү холбуур бобуулаах.
Дьон уопсай тоҕуоруһар сирдэрэ, сүрүн уонна көмө хостор кэмиттэн кэмигэр дезинфекцияланар буолуохтара, оҕо оонньуурдарын сууйуохтара. Оҕолор бассейыҥҥа сылдьаллара тохтуо.
Коронавирус дьаҥыттан хааччахтааһын кэмигэр оҕо детсадка кэлбэтэҕинэ борогуулунан ааҕыллыбат, оҕо төһө да уһун кэмҥэ детсакка кэлбэтэҕин иһин кини миэстэтэ былдьаммат, оннунан хаалар.
Бу сыл ахсынньы 31 күнүгэр диэри үөрэх тэрээһинин туһунан инструктивнай-методическай сурук Роспотребнадзоры кытары сөбүлэһиллэн суруллубут. Төрөппүттэр Дьокуускай куорат үөрэххэ управлениетын саайтыгар www.yaguo.ru суругу билсиэхтэрин сөп.
Атырдьах ыйын 20 күнүттэн төлөпүөнүнэн боппуруостарга хоруйдааһын саҕаланыа, бу туһунан иһитиннэрии үөрэх управлениетын саайтыгар тахсыа.
This post was published on 20.08.2020 13:06 13:06