Саха сиригэр социальнай эбийиэктэри тутуу боппуруостарын бырабыыталыстыба бастакы вице-премьерэ Дмитрий Садовников салайааччылаах мунньахха кэпсэттилэр.
Сүрүн тиэмэнэн Дьокуускайга 1 №- дээх 253 үөрэнээччигэ суоттаммыт оскуола тутуутун түмүктээһин буолла. Эбийиэк бэлэм буолуута 98% тиийдэ. Билигин 17 исписэлиис ис киэргэлин уонна электротаҥыытын түмүктүүр, тупсарыыны ыытар, фасаднай элеменнэри уонна парапеттары таҥар.
Мунньахха иһитиннэрбиттэринэн, наадалаах оборудование, миэбэл барыта Дьокуускайга аҕалыллан, хомуллан турар. Билигин оскуолаҕа турар миэстэлэрин булларыы бара турар. Оскуола үөрэнээччилэргэ аанын кулун тутарга хайыы-үйэ арыйара былааннанар.
«Биһиги, биллэн турар, бэдэрээттэһэр тэрилтэбитин да, үөрэнээччилэрбитин да, Дьокуускай куорат олохтоохторун да иһин үөрэбит. Куорат киинигэр бу үчүгэй эбийиэк үлэҕэ киирэн, оҕолорбутугар, үөрэх эйгэтигэр барытыгар үөрүү буолар», — диэтэ Дмитрий Садовников.
Маны таһынан мунньах кыттыылаахтара Дьокуускайга Пирогов уулуссатыгар 4 № — дээх анал (коррекционнай) оскуола тутуутун балаһыанньатын көрдүлэр.
Дмитрий Садовников этэринэн, урукку бэдэрээтчит туруорбут соруктарын кыайбатах. Итинэн сибээстээн, кинини солбуйар уонна кыраапыктан хаалыыны ситиһэр туһунан быһаарыы ылылынна. Билигин госэкспертизаны ааһыыга уонна саҥа тутуу тэрилтэтин быһаарыыга үлэ барар. 2026 сыл бүтүөр диэри эбийиэги туттарар сорук туруорулунна. Бастакы вице-премьер бары тутаах боппуруостары быһаарыы бүтэһиктээх стадиятыгар сылдьалларын уонна регион баһылыгын сорудаҕа толорулларыгар эрэннэрдэ.
Мунньахха Арктика оройуоннарыгар доруобуйа харыстабылын бастакы звенотун эбийиэктэригэр ураты болҕомто ууруллар. Алта модульнай пуун, ол иһигэр Сииктээх, Оһохтоох, Кулун өлбүт, Уянди уонна Дьарҕаалаах сэлиэнньэлэригэр фельдшер-акушер пууннарын, ону таһынан Орто Халыма оройуонун Сыбаатай сэлиэнньэтигэр эмчит амбулаториятын тутуу дьүүллэһилиннэ.
Былырыын үбүлээһин тиийбэтиттэн, бу эбийиэктэри тутуу тохтотулунна. Маныаха нэһилиэнньэ медицинаҕа наадыйыыта улаатар. Сэлиэнньэлэр ыраахтара, уустук килиимэт усулуобуйалара уонна медицина көмөтүгэр тиийиммэт буолуу кыһалҕалара бааллар. Дмитрий Садовников тутууну сөргүтэр боппуруос бырабыыталыстыба үп-экономическай блоктарын кытта бииргэ оҥоһулларын иһитиннэрдэ.
