Хатас сэлиэнньэтигэр тохсунньу 24-25 күннэригэр «Көмүс мас» мас-рестлиҥҥэ Дьокуускай аһаҕас чемпионата буолар. Саха сирин биир сүрүн күрэхтэһиитэ бу сылга мадьыныларга бастакы старт буолуоҕа, диэн ЯСИА иһитиннэрэр.
Күрэхтэһии Хатас нэһилиэгин 7 №-дээх ДЮСШ-га ыытыллыаҕа. Бастакы күн барыллаан хапсыһыы, иккис күнүгэр – бары ыйааһыҥҥа полуфиналлар уонна финаллар ыытыллыахтара.
Помостка ыйааһыҥҥа эр дьон тахсыахтара 60, 65, 70, 75, 80, 90, 105 кг диэри уонна 105 киилэттэн тахса. Дьахталлар 50, 55, 60, 65, 75 кг диэри уонна 75 киилэттэн тахса. Ону тэҥэ эр дьон-бэтэрээннэр ортолоругар (1986 сыл уонна онтон аҕа) 65, 75, 85 кг диэри уонна 85 киилэттэн тахса күрэхтэһиилэр ыытыллыахтара. Кыттааччыларга 2 киилэ ыйааһынтан тахсыы көҥүллэнэр.
Бу турнир үгэс быһыытынан Саха сирин чемпионатын иннинэ элбэх мас-рестлерга бэлэмнэнии түһүмэҕэ буолар.
This post was published on 16.01.2026 17:06 17:06