Дьокуускай куорат мэрията олохтоох дьахтар чааһынай дьиэтин айылҕа уута алдьаппыт ороскуотун толуйуоҕа. Саха сирин үрдүкү суута бастакы инстанция суутун быһаарыытын уларытыыта суох хаалларда, онно сөп түбэһиннэрэн МКУ «СЭГХ» тэрилтэттэн 700 тыһыынчаттан тахса солкуобай ирдиэхтэрэ.
Үрдүкү суут пресс-сулууспата иһитиннэрэринэн, үҥсээччи 8 Марта уулуссаҕа турар дьиэтин 2024 сыл ыам ыйын 4 күнүгэр айылҕа уута ылар. Строительнай уокурук управлениетын хамыыһыйата суолу кыйа уу түһэр лотоктартар бөҕүнэн туолбуттара төрүөт буолбутун быһаарда. Дьиэ иһигэр киирбит уу мунньуллан, муостаны, истиэнэни, бүүрүктэрин алдьаппыт. Ону таһынан обуойга түүнүк көстүбүт.
Бастакы экспертиза өрөмүөн сыанатын 548 326 солк. сыаналаата. Бас билээччи Дьокуускай уокуруктааҕы дьаһалтатыгар, «Якутдорстрой» АК уонна «Служба эксплуатации городского хозяйства» МКУ (СЭГХ) хоромньуну уонна суут ороскуотун толуйарга ирдэбил биэрдэ.
Суукка дьаһалта уонна «Якутдорстрой» бэрэстэбиитэллэрэ ирдэбили кытта сөбүлэспэтилэр. Дьиэни уу ылыытын төрүөтүнэн учаастакка түспүт хаар ууллуута буолуон сөп диэн сабаҕалаабыттар, ону тэҥэ 1974 сыллааҕы тутуу дьиэ эргэрбитин ыйбыттар. “Якутдорстрой” уу түһэр лотоктары оҥоруунан дьарыктамматын уонна дьаһалта сорудаҕынан эрэ үлэлиирин, бу аадырыс сорудах киирбэтэҕин эттэ. «СЭГХ» МКУ бэрэстэбиитэлэ мунньахха кэлбэтэх эрээри, суругар хамыыһыйа оҥорбут аактатын сокуоннайын саарбахтаабыт.
МКУ «СЭГХ» көрдөһүүтүнэн суут сыаналыыр экспертизаны хаттаан ыытары анаата. Кини дьиэ эргэриитин учуоттаан, өрөмүөн сыанатын 665 720 солк. сыаналаата.
Дьокуускай куорат суута ирдэһээччи өттүгэр турда, онон «СЭГХ» МКУ-тан хоромньу толору сууматын, ону тэҥэ суут ороскуотун, уопсайа 53 тыһыынча солкуобайтан ордугу, ирдээтэ. Эппиэттээччи бу быһаарыыны үҥсэ сатаата да, Саха сирин Үрдүкү суута суут аактатыгар орооһор төрүөтү булбата.
This post was published on 28.01.2026 16:09 16:09