Хаҥаласка байыаннайдары араартыыр пууҥҥа өлүү түбэлтэтин кэнниттэн хонтуруоллуур дьаһаллары күүһүртүлэр: баскыһыанньа түүн быстах байыаннай хомуурга ыҥырыллыбыт 1983 сыл төрүөх эр киһи үөһэттэн түһэн өлбүт. Хас биирдии этээскэ полиция дьуһуурустубата баар буолуоҕа. Билиҥҥитэ силиэстийэ бара турар. Бу туһунан СИА-ҕа өрөспүүбүлүкээ байыаннай комиссара Александр Авдонин иһитиннэрдэ.
Билигин биллэринэн, араартыыр пууҥҥа үс биир дойдулаахтар түүн кэлбиттэр. Кэлэн иһэн суолга арыгылаабыттар. Кинилэри пууҥҥа киллэрэллэригэр арыгыларын былдьаабыттар уонна хосторунан утута ыыппыттар. Кэлбит дьон түүнүн салгыы арыгылаары табаарыстарын туалетка баар форточканан утуйар таҥастарынан быа оҥорон, аллараа түһэрэ сатаабыттар.
«Куттал суох буолуутун миэрэтин кэһии таҕыста.Иэдээн быһыы-майгы. Биһиги личнэй састаабы хонтуруолга буруйдаахпытын билинэбит. Билигин хонтуруол дьаһалларын күүһүртүлэр. Хас биирдии этээскэ полиция постара туруоруллуохтара, дьуһуурустуба куруук баар буолуоҕа. Түннүктэр бары сабыллыахтара. Хомуур пуун үлэһиттэригэр барыларыгар инструктаж ыытылынна. Кэлбит дьон арыгылаабыттарын суоҕун медиктары кытары бэрэбиэркэлиибит. Мин хомуур пуунугар кэлэр дьону киһи сиэринэн испэккэ кэлэллэрин ыҥырабын», — диэн Александр Авдонин иһитиннэрдэ.
«Алдьархай чахчытынан силиэстийэ ыытыллар. Прокуратура уонна силиэстийэлиир кэмитиэт уорганнара үлэлииллэр. Холуобунай дьыала тэриллиэҕэ. Буруйдаахтар буруйдарын боруостуохтара», — диэн военком бэлиэтээтэ.
