Саха сиригэр сэтинньи 1 күнүттэн Дьокуускай — Аллараа Бэстээх маршрутунан Өлүөнэ өрүһү туоруур паром үлэтин түмүктээтэ. Муус туруутун кэмигэр таһыыны Жатай — Төхтүр маршрутунан ыытыахтара, диэн ЯСИА иһитиннэрэр.
«Сэтинньи 1 күнүттэн Дьокуускай уонна Аллараа Бэстээх икки ардыларыгар паром үлэтин тохтотор. Билигин «ЛОРП» ПАУо суудуналара Жатай – Төхтүр маршрутунан айанныыллар. Биһиги паромнарбыт кыһыҥҥы турууга бэлэмнэнэллэр, кэлэр навигацияҕа бэлэмнэниэхпит уонна суднолары өрөмүөннүүр үлэни былаанныыбыт. Икки паром буксуурдары батыһан соторутааҕыта Аллараа Бэстээх диэки кытылга хаалбыт хас да массыынаны таһарга айаннаатылар. Кинилэри Дьокуускайга аҕалыахпыт. Бүгүн кассалар уонна массыына мустар былаһааккалара кыһыҥҥы кэмҥэ сабыллыахтара”, — диэн “Саха сирин паромнара” УК салайааччыта Николай Ефимов ЯСИА быһаарда.
Санатан эттэххэ, алтынньы 16 күнүттэн Дьокуускай уонна Аллараа Бэстээх икки ардыларыгар «Хивустар» сылдьаллар. Дьокуускайтан 204-с микрооройуоҥҥа «Намыв» ыстаансыйаттан бараллар. 20-чэ салгын олбохтоох суудуна үлэлиир.
This post was published on 01.11.2025 13:35 13:35