«Халыма» суолга Дьокуускай — Аллараа Бэстээх маршрутунан Өлүөнэ өрүһү туоруур муус суолу 2026 сыл тохсунньу 5 күнүгэр арыйар былааннаахтар. Бу туһунан «Бүлүү» Упрдор ФКУ пресс-сулууспатыгар иһитиннэрдилэр.
Ахсынньы 1 күнүттэн «Халыма» суолга Хаандыга — Мэҥэ-Алдан маршрутунан Алдан өрүһү туоруур муус суол үлэлиэҕэ. Ити болдьоххо 4 туоннаҕа диэри ыйааһыннаах тырааныспарга «Бүлүү» суолу арыйыы былааннаммыт. 660-с км (Үөһээ Бүлүү), 807-с км (Күндээдэ), 956-с км (Устье) уонна 1049-с км (Кириэстээх) учаастактарын туһунан этиллэр.
“Арыллыы бүтэһик күннэрэ күн- дьыл, муус халыҥын туругуттан көрөн көннөрүллүөн сөп», — диэн управлениеҕа бэлиэтииллэр.
«Бүлүү» Упрдор ФКУ санатар, муус суоллар официальнайдык аһыллыахтарыгар диэри мууска тахсыы букатын бобуллар. Билигин туоруур сирдэргэ барыларыгар оҥоруу үлэтэ барар, бобуу бэлиэлэрин туруораллар уонна дьуһуурунай постар тэриллибиттэр.
Мууска тахсыы сэрэхтээх!
This post was published on 07.11.2025 18:09 18:09