Өлүөнэ эбэҕэ муус халҕаһалыы устарынан, салгын олбохтоох суудуналарга Дьокуускай — Аллараа Бэстээх хайысханан айан иһин төлөбүр улаатта. Ыам ыйын 15 күнүттэн биир өттүгэр 5000 солк буолла. Ол туһунан ЯСИА-ҕа «ЛенаВодСервис» хампаанньа биригэдьиирэ Борис Строев эттэ.
Сыана үрдээһинэ быстах миэрэ буолар, навигация балаһыанньата тупсуор диэри туттуллар, диэтэ Строев.
«Билигин муус халҕаһалыы устар. Биллибэт, маннык тарыып хас күн турара — биир, икки, үс күн», — диэтэ кини.
Борис Строев чуолкайдаабытынан, «Хивус» катер-амфибиялар хойуу мууска сылдьыбаттар, онон быстах кэмҥэ «Тайфун» аэроботтар сылдьаллар. Бу суудуналар уунан да, мууһунан да айанныыллар.
This post was published on 15.05.2025 10:11 10:11