Алтынньы 26 күнүттэн өрөспүүбүлүкэ сүрүн салгын тэрилтэтэ кыһыҥҥы эрэсиимҥэ көһөр. Кыраапык 2026 сыл кулун тутар 28 күнүгэр диэри салҕанар.
Аэропорт пресс-сулууспата иһитиннэрэринэн, Дьокуускайтан кыһыҥҥы кэмҥэ 34 хайысханан пассажирскай рейст былааннаммыт, олортон 13-һэ киин расписаниетынан. Көтүүлэри 7 авиахампаанньа толоруоҕа. Дьокуускай аэропорт кыһыҥҥы эрэһиимигэр Москваҕа рейстэри урукку курдук үс авиахампаанньа толорор: “Аэрофлот”, С7 Airlines уонна “Якутия”.
«Аэрофлот» Москваҕа (Шереметьевоҕа) барар рейс ахсаанын нэдиэлэҕэ алта төгүл, сууккаҕа биирдии рейска диэри сарбыйда. Көтүүлэр Boeing 737-800 сөмөлүөтүнэн ыытыллаллар.
С7 Airlines хампаанньалар бөлөхтөрө Москваҕа (Домодедовоҕа) күннэтэ Airbus А320neо салгын суднотынан рейстэри толороллор. Новосибирскайга эмиэ нэдиэлэҕэ сэттэ күн көтөр. Иркутскайга рейс — нэдиэлэҕэ алта күн. Владивостокка – нэдиэлэҕэ иккитэ.
«Якутия» авиахампаанньа Россия киэҥник биллэр хайысхаларынан Москва, Санкт-Петербург, Екатеринбург, Новосибирск, Иркутскай, Красноярск, Улан-Удэ, Владивосток, Хабаровскай, Певек көтүүлэрин салҕыыр. Внуковоҕа олорон ылыылаах Россия курортнай куораттарыгар Сочига уонна Минеральнай Ууга рейстэр ыытыллаллар. Харбиҥҥа аан дойдутааҕы рейстэр нэдиэлэҕэ икки көтүү баар.
«Россия» авиахампаанньа Красноярскайга сыл бүтүөр диэри нэдиэлэҕэ үс төгүл көтүөҕэ. Тохсунньу 2 күнүттэн нэдиэлэҕэ түөрт рейс оҥоһуллар.
Өрөспүүбүлүкэҕэ рейстэри «Полярные авиалинии», «Якутия», «Ираэро» уонна «Алроса» авиахампаанньалар толороллор.
