Дьокуускай куорат дууматын дьокутааттара Ил Дархан туруорбут хандьыдааттарыттан аһаҕас куоластааһынынан Дьокуускай баһылыгын талыахтара. Бэрэстэбиитэллээх уорган регламеныгар уларытыылары киллэрии боппуруоһа уочараттаах сессияҕа көрүлүннэ, диэн дума пресс-сулууспатыгар иһитиннэрдилэр.
«Уларытыылар муниципальнай нуорма быраап акталары олохтоох салайыныы туһунан саҥа федеральнайдааҕы уонна өрөспүүбүлүкэтээҕи сокуоннарга сөп түбэһиннэрэр сыалтан, ону тэҥэ быһаарыыны ылыныы процедураларын уонна Дьокуускай куорат думатын нуорма быраап акталарын тупсарыыга бэлэмнэннилэр», — суруллар иһитиннэриигэ.
Дьокуускай куорат Дууматын бэрэссэдээтэлэ Альберт Семенов саҥаны оҥоруу процеһыгар куорат салайааччытын быыбарын механизмын юридическай чуолкайдааһыныгар уонна дьэҥкэтик көстүүтүгэр сүрүн болҕомто ууруллубутун тоһоҕолоон бэлиэтээтэ.
Санатан эттэххэ, Евгений Григорьев 2021 сыл муус устар ыйыттан Дьокуускай баһылыгын дуоһунаһыгар сылдьар. Кини, билиҥҥи боломуочуйалара бүппүтүн кэннэ, саҥа болдьоххо быыбарга киирсэргэ бэлэмин биллэрбитэ.
This post was published on 12.02.2026 12:13 12:13