Ил Дархан иһинэн хоруупсуйаны уонна атын буруйу оҥорууну сэрэтэр управление судаарыстыбаннай былааһы, олохтоох салайыныы уорганын бэрэбиэркэлиир отделын консультана Матвей Гаврильев муниципальнай дуоһунаска үлэҕэ киирэр дьон, итиэннэ үлэһиттэр сыл ахсын муус устар 30 күнүгэр диэри дохуоттарын, баайдарын туһунан дэкэлэрээссийэни туттаралларын туһунан иһитиннэрдэ. Ыспыраапка Арассыыйа Бэрэсидьиэнинэн бигэргэнэн, билигин туттуллар бланката Кириэмил уонна судаарыстыбаннай сулууспалаахтар саайтарыгар баар, суруйда Саха парламент.
Матвей Гаврильев маннык ыспыраапканы толорорго туох ирдэбил тутуһулларын туһунан кэпсээтэ. Ол курдук илиинэн (уруучуканан) көннөрөр табыллыбат, кумааҕы биир илииһигэр бэчээттэнэр, принтер ыраастык, бээтинэтэ, дэпиэгэ суох бэчээттиэхтээх. Физическэй сирэй дохуотун уонна нолуогун туһунан ыспыраапкаҕа нолуок тутулла илигинэ уопсай дохуот ыйыллар, ону толорорго туттуллар 2 НДФЛ билигин 6 НДФЛ диэн буолбут.
Баантан ыспыраапканы сакаастыырга мобильнай сыһыарыы нөҥүө оҥоруохха сөп, онно судаарыстыбаннай сулууспалаахтар ыспыраапкаларын тута ыыталлар. Өскөтүн ыспыраапка сыыһа толорулуннаҕына, 30 күн иһигэр ыам ыйыгар көннөрөр көҥүллэнэр. Ону таһынан, ким хас дьиэлээҕин, массыыналааҕын бас билиигэ судаарыстыбаннай эрэгэстэрээссийэ сибидиэтилистибэтин ыспыраапкаҕа суруйаллар.
Матвей Гаврильев дэкэлэрээссийэни толорорго дьон үксэ тугу сыыһарын туһунан саас-сааһынан кэпсээтэ. Кини депозитнай счеттан киирбит дохуоту ыйбаттарын, ол сыыһанан ааҕылларын иһитиннэрдэ. Оттон ороскуот туһунан салааҕа отчуоттуур сылга кыбартыыраны, массыынаны, сир учаастагын атыыластахха биирдэ ыйыллар. Кэргэнниилэр үс сыллааҕы дохуоттарын ити суума куоһарар түгэнигэр биирдэ толороллор уонна тустаах ыспыраапкалары хомуйан туттараллар.
