Догдоҥо нэһилиэгэр уулуссаҕа таах халтай хаама сылдьар киһини көрүөҥ суоҕа. Сүөһүлээх-астаах өттө оттуу сылдьаллар. Нэһилиэккэ (баһылык П.Д.Сивцев) 3 сүөһү иитиитинэн, 2 сылгынан дьарыктанар бааһынай хаһаайыстыба баар, суруйда «Саха сирэ» саайт.
Баһылык э.т. Николай Павлов этэринэн, хаһаайыстыбаларга 248 сүөһү, 307 сылгы иитиллэн турар. Окко былааны хаһаайыстыбаларынан тиэрдибиттэр. Ол курдук, Лукиннар 10 туоннаны, Карамзиннар 8 туоннаны, Морозовтар 20 туоннаны, кэтэх хаһаайыстыбалар 35 туоннаны бэлэмниэхтээхтэр. “Союз” КФХ 40 туонна оту кэбиһиэхтээх.
— От үүнүүтэ үчүгэй. Быйыл тиэрэ үүннэ. Оннооҕор бу көрөр тэлгэһэҕититтэн оту ыллыбыт. Өссө икки алаастаахпыт. Үс тыраахтарынан оппутун охсубуттара. Юрий Степанов, Спартак Титов, Ян Избеков буоланнар. Үс тыраахтартан иккитэ – “Синтай”. Оппутун дьиэбит таһыгар массыынанан тиэйэн аҕалан кэбиһиэхпит. Тоҕо диэтэххэ, кыһыҥҥы өттүгэр тыраахтарынан оту тиэйии өҥөтө ыарыаҕа. Сорох отчуттарбыт куораттан эҥин көмөлөһө кэлиэхтэрэ, билиҥҥитэ уоппускаҕа бара иликтэр. Онон быйыл сайын сыл тахсар оппутун булунуохпут, — диир эрэллээхтик Леонид Николаевич.
