Аммаҕа Мэҥэ Хаҥалас уонна Амма улуустарын «Үрүҥ торуоска» ыйынан доҕордуу түһүлгэлэрэ буолан ааста. Ыаллыы сытар улуустар көрбөттөр уопсастыбаларын спорстменнара голболга уонна шоудауҥҥа табаарыстыы күрэхтэһиигэ кытыннылар.
Аммаҕа сэтинньи ыйга ыытыллыбыт «Үрүҥ торуоска» декада чэрчитинэн Мэҥэ Хаҥалас уонна Амма көрбөттөр уопсастыбаларын икки ардыгар голболга уонна шоудаҥҥа табаарыстыы күрэхтэр буоллулар. Спортсменнары Амма оройуонун баһылыгын солбуйааччы Иванна Шишигина, улуустааҕы социальнай көмүскэллээх буолуу управлениетын начаалынньыгын эбээһинэһин толорооччу Саргылаана Константинова, реабилитолог-исписэлиис Анна Пахомова, көрбөттөр уопсастыбаларын бэрэссэдээтэлэ Александра Устинова көрсөн эҕэрдэлээтилэр.
Амма улууһун инбэлииттэрин түмсүүтүн бэрэссэдээтэлэ Маргарита Лазарева тэрийэн, салайан ыытта. Бөкөттөн Туйаара Ильина, Александра Рожина, Иван Семенов, Александра Назарова, Светлана Иванова, Нина Слепцова уо.д.а. кытыннылар.
Түмүккэ Амма хамаандата кыайыылааҕынан таҕыста. Олохтоох сынньалаҥ киинин үлэһиттэрэ ырыанан-тойугунан сэргэхситтилэр. Кэлбит ыалдьыттар Аммаҕа саҥа тутуллубут успуорт комплексыгар тренажердаах сааланы, сүүрэр доруосканы сэргии, сэҥээрэ көрдүлэр.
Светлана ИВАНОВА
