19 От ыйа 19.07
  • 14°
  • $ 87,88
  • 96,1

«Доҕордоһуу үрүйэтэ» (Родник дружбы) оҕо талаанын кустук араас өҥүнэн оонньотто

13:14, 04 апреля 2016
Читайте нас на
Яндекс Новости
ЯДВ

Оҕо садтарыгар, оскуолаларга үлэлиир айар коллективтар оҕолоро быйыл үһүс төгүлүн этностар икки ардыларынааҕы «Доҕордоһуу үрүйэтэ» («Родник дружбы») куонкурус улахан түһүлгэтигэр муһуннулар. Тэрэһини үһүс сылын А.Е.Кулаковскай аатынан Норуоттар доҕордоһууларын киинэ үрдүк таһымнаахтык тэрийэн, иилээн-саҕалаан ыытар.

«Куонкурус оҕолор талааннара чочулларыгар, ситэригэр-хоторугар биир сүрүн үктэл. Манна аан бастаан кытта кэлбит оҕолор быыкаа этилэр, билигин номнуо улаатан, үҥкүүлүүр, ыллыыр, уус-уран айымньыны толорор дьоҕурдара үрдээн иһэрэ харахха ала-чуо быраҕыллар», — диэн СИА-ҕа А.Е.Кулаковскай аатынан Норуоттар доҕордоһууларын дьиэтин отделын салайааччыта Любовь Шишигина санаатын үллэһиннэ.

Өрөспүүбүлүкэ араас муннуктарыттан кэлбит оҕолор ансамбылынан да, биирдиилээн да норуот үҥкүүтүгэр, ырыатыгар, музыкальнай инструменыгар, уус-уран айымньыны толорууга илин-кэлин түһүстүлэр. Ону таһынан муода театрдара бэйэ илиитин иһиттэн айыллан, тигиллэн тахсыбыт сиэдэрэйкээн таҥаһы-сабы болҕомто үөһүгэр туруордулар.

Бэҕэһээ, муус устар 3 күнүгэр буолбут улахан дьоро киэһэҕэ лауреаттар, дипломаннар ааттара дорҕоонноохтук ааттанна. Норуот инструменыгар оонньуур 5-8 саастаах оҕолор ортолоругар 1 степеннээх лауреат аатын Дьокуускай куорат «Кэнчээри» оҕо садын «Туллукчаан» ансамбыла (салайааччы Лена Кычкина) ылан үөрүүлэрэ үксээтэ. Оттон 9-13-гэр диэри саастаах оҕлорго Попов Ян бастыҥынан ааттанна. Кинини Иванида Бугулова дьарыктыыр. Бу аакка 6 дипломаны, 9 лауреаты бэлиэтээтилэр.

Норуот уус-уран айымньытын толорууга 9-13 саастаах оҕолор ортолоругар Кэбээйи Мастааҕыттан кэлбит «Айдарыы» фольклорнай ансамбль (салайааччы Сардаана Жакипова) муҥутуур үрдүк кэрдиискэ таҕыста. 14-17 диэри саастаахтарга Дьулуур Давыдов, Филипп Кириллин 1 степеннээх лауреат буоллулар.

«Кэнчээри” оҕо садын иһинэн үлэлиир «Күндү» муода театра (салайааччы Күндүүнэ Варламова, Зоя Иванова, Елена Абрамова) саҕынньахтарын колекцията көрөөччү сөҕүүтүн-махтайыытын ылыан ылла.

Муода театрдарыгар 4 дипломант, 3 лауреат ааттара ааттанна. Итини таһынан норуот ырыатыгар, үҥкүүтүгэр, тылынан уус-уран айымньытыгар кыайыылаахтар билиннилэр.

Следите за самым важным и интересным в Telegram-канале и WhatsApp-группе ЯСИА