Дмитрий Тихонов: Михаил Ефимович барыбытыгар үтүө холобур буолар

Саха дьоно бары ытыктыыр тутаах киһибит, өрөспүүбүлүкэбит сайдыытыгар сүдү кылаатын киллэрбит Саха Өрөспүүбүлүкэтин Бастакы бэрэсэдьиэнэ Михаил Ефимович Николаев күн сириттэн күрэммитэ барыбытыгар ыар сонун буолла, диэн Дмитрий Тихонов тус телеграм-ханаалыгар суруйар.

Куруутун норуотун инникитин туһугар ис сүрэҕиттэн этэн-тыынан, кыһаллан, үлэлээн-хамсаан олорбут Михаил Ефимович үйэтин тухары сайдыы иһин дьулуурдаахтык үтүмэн үлэни ыыппыта барыбытыгар үтүө холобур буолар.

Михаил Ефимович өйбүтүгэр-санаабытыгар дьону-сэргэни түмэ тардар, үлэни-хамнаһы сөптөөхтүк аттарар, инникини өтө көрөн сөптөөх, кэскиллээх тосхолу тутуһар, булгуруйбат күүстээх санаалаах, бигэ тыллаах салайааччы быһыытынан хас биирдиибит өйүгэр-санаатыгар хаалыаҕа.

Бу ыар сүтүкпүтүнэн ытыктабыллаах Михаил Ефимович дьиэ кэргэнигэр, чугас аймах-билэ дьонугар дириҥ кутурҕаммын тиэрдэбин.

This post was published on 07.08.2023 15:22 15:22