Саха сирин бырабыыталыстыбатын бэрэссэдээтэлин бастакы солбуйааччы Дмитрий Садовников социальнай эбийиэктэри тутуу боппуруостарыгар оперативнай штаб мунньаҕын ыытта. Бэбиэскэҕэ Российскай Федерация президенэ Владимир Путин көҕүлээбит «Уһун уонна көхтөөх олох» национальнай бырайыак чэрчитинэн олоххо киллэриллэр доруобуйа харыстабылын бырайыактара, ону тэҥэ «ХХІ үйэҕэ мин Сахам Сирэ» бүтүн өрөспүүбүлүкэтээҕи үтүө дьыала хамсааһынын чэрчитинэн тутулла турар үөрэх уонна культура эбийиэктэрэ киирдилэр.
Доруобуйа харыстабылын кэккэ эбийиэктэригэр кыраапыктан хаалыы баара бэлиэтэннэ. Биричиинэтэ — бэдэрээттэһэр тэрилтэлэр тэрийэр дьаһаллары кэмигэр ылбаттара. Амма оройуонун Амма сэлиэнньэтигэр поликлиника, Мэҥэ Хаҥалас оройуонун Майа сэлиэнньэтигэр балыыһа комплекса, Кэбээйи улууһун Сангаар бөһүөлэгэр балыыһа комплекса, Ньурба куоракка эмтиир корпус, ону тэҥэ Бүлүү уонна Аллараа Бэстээх эбийиэктэрин тутууга ураты болҕомто уурулунна.
“Бу эбийиэктэргэ сакаасчыттары уонна бэдэрээтчиттэри кытта хаалыыны туоратыы уонна үлэ болдьохтоох кэмигэр түмүктэниитин хааччыйыы дьаһалларын дьүүллэстибит», — диэн Дмитрий Садовников тоһоҕолоон бэлиэтээтэ.
«Үтүө дьыала» линиятынан тутуу былааннаах эрэһииминэн ыытыллар. Быйылгы боппуруостар бары муниципальнай сакаасчыттары кытары быһаарыллаллар. 2025 сылга Өймөкөөн оройуонун Үчүгэй сэлиэнньэтигэр 60 миэстэлээх оскуола уонна Өлүөхүмэ оройуонун Заречнай бөһүөлэгэр 60 миэстэлээх оскуола үлэҕэ киирэрэ былааннанар.
Маны сэргэ Хаҥалас улууһун Булгунньахтаах нэһилиэгэр 100 миэстэлээх оҕо саада, Өлүөхүмэ оройуонун Даппарай сэлиэнньэтигэр культурнай-спортивнай комплекс уонна Мииринэй куоракка «Оҕо дыбарыаһа» оҕо эбии үөрэҕин киинэ олоххо киирии түһүмэҕэр бааллар.
Санатан эттэххэ, былырыын Саха сиригэр 60 социальнай эбийиэк, ол иһигэр Россия президенэ Владимир Путин көҕүлээбит национальнай бырайыактарын линиятынан 15 социальнай эбийиэк киллэриллибитэ. Ол иһигэр — 15 оскуола, 4 оҕо саада, 3 атын үөрэх эбийиэгэ, 6 спортивнай эбийиэк, 18 доруобуйа харыстабылын тэрилтэлэрэ уонна 14 культура эбийиэгэ бааллар.
This post was published on 03.09.2025 13:03 13:03