Бырабыыталыстыба бэрэссэдээтэлин бастакы солбуйааччыта Дмитрий Садовников муниципалитеттар баһылыктарын кытта баһаары утары үлэҕэ штаб мунньаҕын ыытта. Кини ойуур уота туруутун утары сэрэтэр үлэ барыахтааҕын, дойду сокуонунан өртөөһүн бобуулааҕын санатта, суруйар СИА.
Дмитрий Садовников иһитиннэрбитинэн, Саха сиригэр бастакы термоточкалар бэлиэтэннилэр. Онон ойуурга кэтээн көрүүлэр ыытыллыахтаахтарын, нэһилиэнньэҕэ сэрэтэр үлэ барыахтааҕын, өртөөһүн бобуулааҕын эттэ.
«Авиалесоохрана» тэрилтэ салайааччыта Владимир Леонов бүгүҥҥү күҥҥэ 17 термическай аномалия баара бэлиэтэммитин эттэ. Термоточкалар Ленскэйгэ, Мииринэйгэ, Аммаҕа, Уус Алдаҥҥа, Горнайга, Бүлүүгэ, Сунтаарга бааллар. Анаалыс түмүгүнэн, Ленскэйдээҕи уонна Мииринэйдээҕи термоточкалар кутталы үөскэппэттэр, техногеннай эбийиэктэргэ киирсэллэр. Атын улуустарга боппуруостар бааллар.
Экология миниистирин солбуйааччы, өрөспүүбүлүкэ кылаабынай лесничайа Андрей Коноплев Маай бырааһынньыктарыгар ойуурга уот туруутуттан сэрэтии үлэтин күһүрдэри эттэ.
