Биир кылааска үөрэнээччи 25 бырыһыаныттан элбэх оҕо ыалдьыбыт буоллаҕына оскуола дириэктэрэ эбэтэр олохтоох салайыныы баһылыга харантыын биллэрбэккэ эрэ оҕолору кэтэхтэн үөрэххэ ыытыахтарын сөп диэн, доруобуйа харыстабылын миниистириэ Елена Борисова бүгүҥҥү социальнай ситимнэринэн быһа эфирин кэмигэр эттэ.
«Арассыыйаҕа оскуоланы дистанционнай үөрэххэ ыытыы бэрээдэгэ биир. Өскөтүн кылааска үөрэнээччи 25 бырыһыаныттан элбэх оҕо ыалдьыбыт буоллаҕына, кириибиттэн, ОРВИттан, ковидыттан тутулуга суох, оскуола дириэктэрэ, кылаас салайааччыта үөрэҕи дистанционнай көрүҥҥэ көһөрөр бырааптаахтар. Итинник мэхэниисиминэн улуус баһылыктара дьаһаныахтаахтар. Суһал ыстаап дьаһалын күүтэр наадата суох«, — диэтэ Елена Борисова.
Миниистир оҕолор ыарыыны чэпчэкитик аһаралларын эттэ. Ол эрэн кинилэр мааска, бэрчээккэ кэтэллэрэ булгуччулааҕын санатта.
This post was published on 09.10.2020 17:01 17:01