Айылҕа саппаас баайын уонна ураты харыстанар сирдэрин дириэксийэтэ өлүөнэ-өлөөн уонна таймыырдааҕы дьиикэй таба үөрдэрин манабылын күүһүрдүүгэ ылсар. Бу күннэргэ хаарынан уонна дьэбэрэнэн айанныыр кыахтаах икки «Сокол» тиэхиньикэни тутта. Бу туһунан СӨ экологияҕа министиэристибэтин пресс-сулууспата иһитиннэрэр.
Тиэхиньикэни Аан дойдутааҕы айылҕа пуондатын Россиятааҕы салаатын (WWF России) көмөтүнэн ылбыттара бэлиэтэнэр. Хаарынан уонна дьэбэрэнэн айанныыр кыахтаах тэриллэр Мииринэй, Өлөөн, Эдьигээн уонна Ньурба улуустарын хайысхатынан үлэлиир «Запад» ураты аналлаах этэрээт туһаныытыгар бэрилиннэ.
«Таймыырдааҕы дьиикэй таба үөрүн көһө сылдьар сороҕо өрөспүүбүлүкэ арҕаа өттүгэр үксүн күһүн, алтынньыга-сэтинньигэ кэлэн барар», — диэн этиллэр.
Министиэристибэ бэлиэтииринэн, көһө сылдьар дьиикэй кыыллар өрөспүүбүлүкэҕэ кыһыҥҥы суол-иис суох, ханнык баҕарар сиринэн сылдьар кыахтаах тиэхиньикэ эрэ тиийэр кэмигэр кэлэллэр. Анал тиэхиньикэ дьиикэй таба үөрэ сылдьар сирин бүтүннүүтүн хабар манабыл уонна булт баайын саппааһын көмүскэлэ олохтонуутугар төһүү күүс буолуоҕа, диэн суруйар НВК «Саха».
