Дьиэтээҕи баһаары биллэрэр тэрили туруоруу дьон олоҕун-дьаһаҕын, доруобуйаларын харыстыыр биир саамай көдьүүстээх дьаһалынан буолар. АДПИ кэмигэр туруоруллубут буолан, Сунтаар улууһун Кутана сэлиэнньэтигэр чааһынай дьиэҕэ баһаарга сокуоннай сааһын ситэ илик оҕолоох ыал эмсэҕэлээбэтэ. 2024 сыллаахха МПЧ-7 үлэһиттэринэн уонна дьаһалта дьаһалынан бары дьиэлэргэ маннык тэриллэри туруорбуттара. Ол туһунан www.sakha.gov.ru сайт суруйар.
«Бүгүн 05:38 чааска Сунтаар улууһун Кутана нэһилиэгэр чааһынай икки этээстээх олорор дьиэҕэ баһаар туһунан 1 №-дээх баһаарынай чаас сибээһин пуунугар иһитиннэрии киирэр. Баһаар буруотун билэр тэрил үлэлээбитинэн,дьиэ түөрт олохтооҕо, ол иһигэр биир сааһын туола илик оҕо, бары дьиэттэн куоттулар», — диэн Саха сирин гражданскай оборуонаҕа дьыалатыгар уонна нэһилиэнньэ олоҕун-дьаһаҕын куттала суох буолуутун хааччыйыыга министиэристибэ иһитиннэрдэ.
Быһылаан миэстэтигэр Кутана сэлиэнньэтин МПЧ-7 дьуһуурунай караула суһаллык тиийдэ. Баһаарынай подразделение кэлэригэр дьиэ аһаҕас уотунан умайа турара. Баһаар түмүгэр, олорор дьиэ иэнинэн бүтүннүүтэ уокка былдьанна. Баһаары туоратыыга 6 киһи тус састааптан уонна биир баһаарынай техника үлэлээтэ, үс киһи көҥүл баһаарынай хамаанда, ону тэҥэ «Айан-суол» ААО автоцистерната үлэлээтилэр. Баһаар биричиинэтэ, буруйдаах дьон уонна материальнай хоромньу кээмэйэ олохтонор.
