Саха сиригэр хаһаайыстыбалар бары көрүҥнэригэр таба ахсаана 2026 сыл саҥатыгар 166,7 тыһыынча буолла. Кэлиҥҥи алта сылга уопсай төбө 14 тыһыынчаттан тахса эбиллибит, ол эбэтэр 2020 сыллаахха 152 тыһыынча таба ааҕыллыбыт. Билигин регион дьиэ табатын ахсаанынан Россияҕа үһүс миэстэҕэ турар.
Хотугу табаны иитиинэн бүгүн 107 тыа хаһаайыстыбатын тэрилтэтэ, 13 пиэрмэр хаһаайыстыбата уонна биирдиилээн урбаанньыттар дьарыктаналлар. Таба биригээдэлэригэр 1232 киһи үлэлиир, ол иһигэр 997 табаһыт уонна 235 чуумсук.
Таба ордук Усуйаана, Анаабыр, Булуҥ, Муома, Эбээн-Бытантай уонна Аллараа Халыма оройуоннарыгар баар.
Холобур, Анаабыр улууһугар кэнники сылларга таба ахсаана 22 тыһыынча кэриҥэ тиийдэ, ол аата сэбиэскэй кэм рекордугар чугас — 1988 сыллаахха манна 27 тыһыынча ааҕыллара.
2026 сылга тыа хаһаайыстыбатын сайыннарыы судаарыстыбаннай бырагырааматынан табаһыттарга көмөлөһүүгэ 1,2 млрд солк.көрүллүбүт. Бу харчы сыл устата 19 улууска салааны өйүүргэ барыаҕа.
Өрөспүүбүлүкэ бюджетыттан баазалары, хааччахтары уонна күрүөлэри тутууга, эдэр табалары атыылаһыыга уонна олору тиэйиигэ, ону тэҥэ көһө сылдьар сирдэри кыйа дьиэлэри тутууга үп-харчы көрүллэр. Хаһаайыстыбалар саҥа техниканы — вездеходтары уонна снегоходтары ылаллар. Саха сирин баһылыга Айсен Николаев Арктиканы сайыннарыы туһунан ыйааҕынан, 2030 сылга Арктика оройуоннарыгар олохтоох тыа хаһаайыстыбатын бородууксуйатын оҥорон таһаарыыны икки төгүл улаатыннаран былаан турар.
This post was published on 10.03.2026 17:11 17:11