Үөрэх үлэһиттэрин Тохсунньутааҕы мунньахтарыгар Дьиэ кэргэн сылыгар оҕону иитиигэ, оҕо-аймах кыһалҕаларын быһаарыыга, о.д.а. үлэни, сүрүн хайысхалары торумнаатылар. Тохсунньу 22 күнүгэр «Навигация детства в Год семьи в России: приоритеты, направления и технологии деятельности» диэн стратегическай сессия буолан ааста.
Манна сүүстэн тахса киһи кытынна. Бары да оҕону иитиигэ сыһыаннаах дьон: үөрэх эйгэтигэр былаас уорганнарын, үрдүк үөрэх тэрилтэлэрин бэрэстэбиитэллэрэ, «Навигаторы детства» эрэгийиэннээҕи ресурснай киин үлэһиттэрэ, «Движение первых» хамсааһын бэрэстэбиитэллэрэ, улуустартан педагогтар, дириэктэр сүбэһиттэрэ, уопсастыбанньыктар, о.д.а. кытыннылар.
Чахчы да, сыл саҕаланыыта үлэ хайысхаларын, сүрүн соруктарын торумнуохха наада буоллаҕа. Бу үлэ Арассыыйаҕа ыытыллар Дьиэ кэргэн, Саха сиригэр Оҕо саас сылын сүрүн тэрээһиннэрин, хайысхаларын кытта сөп түбэһиэхтээх.
Мунньах кыттыылаахтарын «Росдетцентр» киин дириэктэрэ Александр Кудряшов эҕэрдэлээтэ. Маны тэҥэ, үөрэх миниистирин солбуйааччы Алевтина Аргунова, «Навигаторы детства» киин салайааччыта Ньургуйаана Макарова кытыннылар.
Үс интерактивнай былаһааккаҕа хайдыһан, үлэлээтилэр, Дьиэ кэргэн сылыгар олоххо киириэхтээх бырайыактарын оҥордулар уонна көмүскээтилэр. Ол курдук, оҕолору, ыччаты дьиэ кэргэн төрүт үгэстэригэр иитии, төрөппүт эппиэтинэһин үрдэтии, социальнай партнерство, о.д.а. тиэмэлэргэ бырайыактар оҥоһулуннулар.
Бары биир кэлим халандаардаах былааны оҥорор туһунан биир санааҕа кэллилэр. Оҕолор буруйу оҥороллорун сэрэтэр «Дьиэ кэргэн уонна оҕолор» информационнай платформаны тэрийии, үөрэх тэрилтэлэригэр дьиэ кэргэн сыаннастарыгар үөрэтэр уруоктары ыытарга методическэй көмөнү оҥоруу, психологическай куурустары, төрөппүттэргэ анал уруоктары ыытыы, оҕону иитиигэ бастыҥ уопуту тарҕатыы, тастан киирэр информацияттан оҕолору, ыччаты көмүскээһин, Дьиэ кэргэҥҥэ иитии күнүн олохтооһун, о.д.а. — бу маннык соруктары туруордулар.
Идиэйэлэри киллэрии акселераторыгар элбэх интэриэһинэй этии киирдэ. Холобур, Дьиэ кэргэн IT- мусуойун тэрийии, эппиэтинэстээх төрөппүттэр марафоннарын ыытыы, идэҕэ туһаайыыга төрөппүтү кытыннарыы, о.д.а.
Стратсессия кэмигэр «Российский детско-юношеский центр» диэн тэрийэр-методическэй управление методиһа Наталья Шибанова онлайн көрүҥүнэн быһа холбоно сырытта, сүбэни-аманы биэрдэ. Дьиэ кэргэн сылын былааныгар киирит сүрүн тэрээһиннэр үксүгэр оҕо саас навигатордарыттан — дириэктэрдэр иитэр үлэҕэ сүбэһиттэриттэн тутулуктаах диэн кини тоһоҕолоон бэлиэтээтэ.
Элбэх киһи толкуйа холбостоҕуна, уустугу да тобулуон, үгүһү да кыайыан сөп. Стратегическай сессия түмүгүнэн резолюция ылыллан, Үөрэх үлэһиттэрин тохсунньутааҕы мунньахтарыгар көрүлүннэ.
